ការងារអនឡាញ ១១ យ៉ាងដើម្បីបង្កើតប្រាក់ចំណូលបន្ថែម

ប្រទេសកម្ពុជាមានប្រជាជនដែលកំពុងប្រើប្រាស់បណ្តាញអ៊ីនថឺណែតយ៉ាងទូលំទូលាយ។ ផ្អែកតាមស្ថិតិឆ្នាំ ២០២៣ ត្រឹមខែមករា ប្រទេសកម្ពុជាមានអ្នកប្រើប្រាស់អ៊ីនថឺណែតប្រមាណ ១១,៣៧ លានអ្នក​ ដែលស្មើនឹងប្រហែល​ ៦៧,៥% នៃប្រជាជនសរុប។ ស្ថិតិឆ្នាំ ២០២២ ខែធ្នូបានឲ្យដឹងថា ប្រជាជនប្រមាណ ១១,៧៥ លានអ្នកកំពុងប្រើប្រាស់បណ្តាញសង្គមហ្វេសប៊ុក ដែលស្មើនឹង ៦៥,៣% នៃប្រជាជនសរុប។ រហូតមកដល់ឆ្នាំ ២០២៥ នេះ ស្ថិតិត្រូវបានប៉ាន់ប្រមាណថា ចំនួនអ្នកប្រើប្រាស់នៃអ៊ីនថឺណែត និងបណ្តាញសង្គមអាចនឹងកើនឡើងបន្តទៀត។ តើលោកអ្នកដឹងឬទេថា បណ្តាញអ៊ីនថឺណែតអាចផ្តល់ការងារបន្ថែមដល់អ្នក។ ខាងក្រោមនេះគឺជាគំនិតអាជីវកម្មបន្ទាប់បន្សំដែលលោកអ្នកអាចធ្វើដើម្បីរកចំណូលបន្ថែម។

១. ធ្វើទីផ្សារណែនាំ

ទីផ្សារណែនាំគឺជាការលក់ផលិតផល ឬសេវាកម្មរបស់អ្នកដទៃ ឲ្យទៅអតិថិជន ហើយយើងជាអ្នកណែនាំទទួលបានប្រាក់កំរ៉ៃជើងសារពីរាល់ការលក់នោះ។ តាមពិត ការធ្វើបែបនេះត្រូវបានអនុវត្តនៅទីផ្សារជាក់ស្តែងជាយូរលង់ណាស់មកហើយ តែតាមរយៈការទំនាក់ទំនងផ្ទាល់ ឧទាហរណ៍ការធ្វើជាឈ្មួញជើងសារក្នុងទីផ្សារអចលនទ្រព្យជាដើម។ តែការធ្វើទីផ្សារបែបនេះតាមរយៈអនឡាញ មានលក្ខណៈខុសគ្នាបន្តិច ត្រង់ថា តាមអនឡាញ ឈ្មួញជើងសារធ្វើទីផ្សារទៅលើតំណ (Link) ដែលនៅពេលនរណាម្នាក់ចុចតំណនោះ ហើយទិញផលិតផល ម្ចាស់តំណនឹងទទួលបានកំរ៉ៃជើងសារ។ ប៉ុន្តែ ស្រដៀងនឹងការធ្វើក្នុងទីផ្សារជាក់ស្តែងដែរ ភាពជោគជ័យនៃការធ្វើអនឡាញនៅតែពឹងលើ ទំនុកចិត្តដែលអ្នកអាចបង្កើតជាមួយទស្សនិកជនរបស់អ្នក ទើបអាចលក់ដាច់ផលិតផល ឬសេវាកម្មទាំងនោះ។ អ្នកអាចធ្វើទីផ្សារនូវផលិតផលអនឡាញនៅលើ MaxBounty Amazon Shopee Lazada ជាដើម។ ការធ្វើទីផ្សារណែនាំសាកសមខ្លាំងសំរាប់អ្នកដែលកសាងទំព័របណ្តាញសង្គម ប្លុក ឬ យូធូប ជាដើម ដោយការដាក់តំណនៃផលិតផល ឬសេវាកម្មពាក់ព័ន្ធទៅកាន់ទស្សនិកជនរបស់អ្នក ប៉ុន្តែអ្នកត្រូវតែផ្តោតលើការផ្តល់តម្លៃពិតប្រាកដដល់ទស្សនិកជនរបស់អ្នក សំរាប់ភាពជោគជ័យយូរអង្វែង និងការរក្សាកេរ្តិ៍ឈ្មោះលើអនឡាញ។

២. ផ្តល់សេវាកម្មឯករាជ្យ

បើសិនអ្នកមានជំនាញដូចជា ការរចនាក្រាហ្វិក ការសរសេរឬនិពន្ធ ការកែវីដេអូ ការសរសេរកូដកម្មវិធី ឬការបកប្រែ ជាដើម អ្នកអាចផ្តល់សេវាកម្មឯករាជ្យទាំងនេះនៅលើគេហទំព័រការងារដូចជា Fiverr Upwork Freelancer ជាដើមបាន។ ​ការផ្តល់សេវាកម្មនេះមិនទាមទារឲ្យអ្នកបង់ថ្លៃសេវាអ្វីទេ លោកអ្នកគ្រាន់តែចុះឈ្មោះ បើគណនេយ្យមួយ ហើយផូសផ្សព្វផ្សាយសេវាកម្មរបស់អ្នកនៅលើគេហទំព័រទាំងនោះ។ នៅពេលអ្នកទទួលបានការងារនិងប្រាក់ចំណូល លោកអ្នកអាចសុំដកលុយចេញពីគេហទំព័រទាំងនោះ តាមរយៈការផ្ទេរលុយតាមធនាគារ។ អ្វីដែលអ្នកត្រូវមានគឺជំនាញ និងសេវាអ៊ីនថឺណែត ជាការស្រេច។

៣. ការបង្កើតមាតិកាលើយូធូប និងតិកតុក

លោកអ្នកក៏អាចបង្កើតវិដេអូថ្មីៗហើយផូសក្នុងយូធូប ឬតិកតុកអំពីប្រធានបទដូចជា ដំណើរកំសាន្ត វប្បធម៌ អាហារ ការលើកទឹកចិត្ត ឬវីដេអូបង្រៀន ជាដើម។ លោកអ្នកអាចរកលុយបានពីការផ្សាយពាណិជ្ជកម្ម​ ម្ចាស់ឧបត្ថម្ភ និងទីផ្សារណែនាំផងដែរ។ អ្នកក៏អាចបង្កើតវីដេអូដែលនិយាយអំពីការលើកទឹកចិត្ត ឬការរៀបចំហិរញ្ញវត្ថុជាដើម ដោយប្រើប្រាស់ បញ្ញាសិប្បនិម្មិត្ត (AI)។ ដើម្បីជោគជ័យក្នុងការធ្វើវា លោកអ្នកត្រូវមានការប្រឹងប្រែងបង្កើតមាតិកាថ្មីៗ ហើយផូសឲ្យបានទៀតទាត់ ដូចជា ការបង្កើតវីដេអូលើយូធូបឲ្យបាន ២ ឬ ៣ ក្នុងមួយសប្តាហ៍។

៤. អាជីវកម្មបោះពុម្ភអាវយឺត

បើសិនជាលោកអ្នកមានជំនាញ និងចំណង់ចំណូលចិត្តក្នុងការឌីហ្សាញរូបភាពស្អាតៗសំរាប់ដាក់លើអាវយឺត កែវកាហ្វេ សំបកទូរស័ព្ទ លោកអ្នកអាចប្រើប្រាស់ជំនាញនេះដើម្បីលក់សំភារៈទាំងនោះតាមអនឡាញ។ មានគេហទំព័រមួយចំនួនដែលអាចឲ្យអ្នកគ្រាន់តែបញ្ជូនចូលនូវរូបឌីហ្សាញរបស់អ្នក ហើយវានឹងត្រូវបានគេលក់ដោយការបោះពុម្ភដោយផ្ទាល់នៅលើសំភារៈទាំងនោះ គេហទំព័របែបនេះមានដូចជា Redbubble Teespring Printify ជាដើម។ ​លោកអ្នកមិនចាំបាច់បោះពុម្ភនិងលក់ដោយខ្លួនឯងនោះទេ លោកអ្នកគ្រាន់តែរចនារូបភាពស្អាតៗ ទាក់ទាញ ហើយបញ្ជូនចូលគេហទំព័រជាការស្រេច។

៥. លក់ផលិតផលឲ្យគេ (Dropshipping)

អាជីវកម្មមួយប្រភេទទៀតគឺការលក់ផលិតផលរបស់គេ ដោយលោកអ្នកត្រូវបង្កើតទីផ្សារអនឡាញមួយដោយប្រើប្រព័ន្ធដូចជា Shopify WooCommerce ជាដើម។ វាជាការលក់ផលិតផលដោយមិនចាំបាច់មានផលិតផលក្នុងស្តុកខ្លួនឯង ដោយលោកអ្នកអាចធ្វើការជាមួយដៃគូផ្គត់ផ្គង់នៅក្រៅប្រទេស ឬក្នុងស្រុក។ បន្ទាប់មក លោកអ្នកគ្រាន់តែដាក់តាំងផលិតផលទាំងនោះអនឡាញលើគេហទំព័រ ឬបណ្តាញសង្គមរបស់អ្នក។ នៅពេលដែលអ្នកទទួលការកម្មង់ទិញ លោកអ្នកអាចយកប្រាក់នោះទៅកម្មង់ទិញពីអ្នកផ្គត់ផ្គង់របស់អ្នក ហើយឲ្យអ្នកផ្គត់ផ្គង់នោះដឹកផលិតផលទៅកាន់អតិថិជនផ្ទាល់តែម្តង។ អាជីវកម្មនេះមានភាពជោគជ័យច្រើនបើសិនលោកអ្នកមានចំណង់ចំណូលចិត្តក្នុងវិស័យការធ្វើទីផ្សារអនឡាញខ្លាំង។

៦. ការបង្រៀនតាមអនឡាញ

បើសិនជាអ្នកមានជំនាញអ្វីមួយដែលអាចធ្វើការបង្រៀនបាន ដូចជា ភាសាអង់គ្លេស ភាសាខ្មែរ ឬមុខវិជ្ជាបច្ចេកទេសណាមួយ អ្នកអាចធ្វើការបង្រៀនជំនាញនោះតាមអនឡាញបាន នៅពេលទំនេរពីការងារ ដោយប្រើប្រាស់សេវាកម្មជួបជុំតាមអនឡាញដូចជា Zoom Google Meet Microsoft Teams ជាដើម។ មុខវិជ្ជាដូចជា គណិតវិទ្យា ការសរសេរកូដ​ ឬអាជីវកម្មជាដើម អាចរកលុយបានច្រើន។ វិធីម្យ៉ាងទៀតក្នុងការរកចំណូលបែបអសកម្មពីវគ្គសិក្សាអនឡាញ គឺការបង្កើតវគ្គសិក្សាបែបអនឡាញនៅតាមគេហទំព័រដូចជា Udemy Skillshare Teachable Thinkific ជាដើម។ ក្នុងការបង្រៀនបែបនេះគឺលោកអ្នកមិនចាំបាច់ជួបសិស្សផ្ទាល់នោះទេ គឺលោកអ្នកគ្រាន់តែរៀបចំបង្កើតជាវីដេអូ ឯកសារPDF តេស្តសមត្ថភាពស្រាប់ៗ ហើយចងក្រងជាវគ្គសិក្សាលើគេហទំព័រទាំងនោះ។ នៅពេលមានអ្នកទិញវគ្គសិក្សារបស់អ្នក លោកអ្នកនឹងទទួលបានចំណូលដុល ដោយមិនចាំបាច់បង្រៀនដោយផ្ទាល់។ តែជួនកាលលោកអ្នកត្រូវចាំទទួលសំនួរផ្សេងៗពីសិក្ខាកាមរបស់លោកអ្នក ហើយធ្វើការឆ្លើយទៅនឹងសំនួរទាំងនោះ។

៧. ការធ្វើទីផ្សារ CPA

ការរកប្រាក់អនឡាញម្យ៉ាងទៀតគឺជាការធ្វើទីផ្សារ CPA ឬ ជាពាក្យពេញ Cost-Per-Action ដោយការផ្សព្វផ្សាយនូវពាណិជ្ជកម្មឲ្យក្រុមហ៊ុន ឬអាជីវកម្មផ្សេងៗ ដែលអ្នកនឹងទទួលបានកំរ៉ៃជើងសារ បើសិនអ្នកដែលអ្នកផ្សាយទៅដល់ធ្វើសកម្មភាពណាមួយសំរាប់ក្រុមហ៊ុន ឬអាជីវកម្មនោះ ដូចជា ការដាក់អាស័យដ្ឋានអ៊ីម៉េល ការតេស្តផលិតផលសាកល្បង ឬការទិញផលិតផល ជាដើម។ ​ដើម្បីធ្វើការផ្សព្វផ្សាយ លោកអ្នកអាចប្រើមធ្យោបាយផ្សេងៗដូចជា ការប្រើវីដេអូ AI ការប្រើប្រាស់បណ្តាញសង្គមដើម្បីផ្សាយពាណិជ្ជកម្ម ជាដើម។ ការធ្វើទីផ្សារ CPA មានភាពជោគជ័យច្រើនសំរាប់ការធ្វើទីផ្សារពាក់ព័ន្ធនឹង ការលើកទឹកចិត្ត ហិរញ្ញវត្ថុ ឬការរកលុយ និងការថែរក្សាសុខភាព ឬព្យាបាលជំងឺ។ ដើម្បីជោគជ័យក្នុងវិស័យនេះ លោកអ្នកត្រូវមានការប្រឹងប្រែង និងចេះភាសាអង់គ្លេសខ្លះៗដែរ។

៨. ការគ្រប់គ្រងទំព័របណ្តាញសង្គម

បណ្តាញសង្គមដើរតួនាទីយ៉ាងសំខាន់ក្នុងបរិបទអាជីវកម្មសព្វថ្ងៃ ជាពិសេស ហ្វេសប៊ុក (បរិបទប្រទេសកម្ពុជា)។ មានអាជីវកម្មជាច្រើនដែលត្រូវការការលូតលាស់អាជីវកម្មនៅលើបណ្តាញសង្គម។ ក្នុងន័យនេះ លោកអ្នកមានឳកាសក្នុងការងារមួយគឺការគ្រប់គ្រងទំព័របណ្តាញសង្គមឲ្យអាជីវកម្មផ្សេងៗ តាមរយៈការបង្កើតមាតិកាថ្មីៗ ការផូសតាមកាលវិភាគ និងការធ្វើអន្តរកម្មជាមួយអតិថិជន។ ក្នុងការងារនេះ លោកអ្នកត្រូវមានចំនេះដឹងផ្នែករចនារូបភាព ធ្វើវីដេអូ​ ដោយលោកអ្នកមិនចាំបាច់ចេះប្រើកម្មវិធីឌីហ្សាញស្មុគ្រស្មាញពេកក៏បាន ដោយការប្រើប្រាស់កម្មវិធី Canva ជាដើម។ អាជីវកម្មជាច្រើនកំពុងរង់ចាំសេវាកម្មរបស់អ្នក។

៩. ការលក់ផលិតផលអនឡាញ

លោកអ្នកក៏អាចលក់ផលិតផលតាមអនឡាញផងដែរបើសិនលោកអ្នកមានផលិតផលខ្លួនឯង តាមបណ្តាញសង្គម ឬគេហទំព័រផ្សេងៗ។ ផលិតផលនោះអាចជាផលិតផលឌីជីថល ដូចជា សៀវភៅឌីជីថល វគ្គសិក្សា ជាដើម។ អ្នកក៏អាចលក់ផលិតផលផ្ទាល់ដោយប្រើប្រាស់ហ្វេសប៊ុកជាដើម ដោយការបង្កើតផេក និងធ្វើទីផ្សារតាមរយៈការទិញពាណិជ្ជកម្មពីហ្វេសប៊ុកជាដើម។ លោកអ្នកអាចទិញផលិតផលពីគេហទំព័របរទេស ដូចជា Lazada Taobao Aliexpress ជាដើម ក្នុងតម្លៃដើមពីអ្នកផ្គត់ផ្គង់ក្រៅប្រទេស ឬក្នុងប្រទេស រួចលក់បន្តទៅកាន់អតិថិជនរបស់អ្នកតាមរយៈហ្វេសប៊ុក ខ្មែរ២៤ ជាដើម។ ភាពជោគជ័យនៃការលក់ផលិតផលអនឡាញគឺឋិតលើការរើសផលិតផលបានល្អ មានគុណភាព តែតម្លៃធូរ និងត្រូវនឹងតម្រូវការទីផ្សារ និងការចេះធ្វើទីផ្សារដែលចំនាយតិច។

១០. ការលក់រូបភាព និងវីដេអូឲ្យគេហទំព័រផ្សេងៗ

បើសិនអ្នកមានជំនាញ និងចំណង់ចំណូលចិត្តក្នុងការថតរូបភាព ឬវីដេអូស្អាតៗ ដូចជារូបភាពទេសភាព វីដេអូទេសភាព ជាដើម អ្នកអាចលក់រូបភាព និងវីដេអូទាំងនោះនៅលើគេហទំព័រស្តុករូបភាព និងវីដេអូដែលគេនឹងលក់បន្តរូបភាព វីដេអូទាំងនោះ ដោយបានទទួលសិទ្ធិពីអ្នក។ គេហទំព័រទាំងនោះមានដូចជា Shutterstock Adobe Stock Getty Images ជាដើម។ រូបភាព ឬវីដេអូដែលមានតម្រូវការច្រើនមានដូចជា ការធ្វើដំណើរ ទេសភាព វប្បធម៌ និងអាហារ។

១១​. ជំនួយការអនឡាញ

ការងារមួយទៀតដែលអាចឲ្យអ្នករកចំណូលបន្ថែមបានគឺការធ្វើជាជំនួយការអនឡាញ។ ជាមួយការងារនេះ អ្នកអាចផ្តល់សេវាកម្មទៅកាន់អាជីវកម្ម ឬក្រុមហ៊ុននានាដែលត្រូវការសេវាកម្មដូចជា ការសរសេរអ៊ីម៉េល ការធ្វើអ៊ីម៉េលម៉ាឃីតធីង ការបញ្ចូលទិន្នន័យ ឬ សេវាបម្រើអតិថិជន ជាដើម។ អ្នកអាចធ្វើការងារនេះឲ្យក្រុមហ៊ុនទូទាំងពិភពលោកដែលត្រូវការសេវាកម្មរបស់អ្នក។​ អ្នកអាចស្វែងរកការងារទាំងនេះនៅតាមគេហទំព័រដូចជា PeoplePerHour ជាដើម។

តើការងារបន្ថែមមួយណាដែលត្រូវនឹងជំនាញ និងចំណង់ចំណូលចិត្តរបស់អ្នក? សូមផ្តល់យោបល់ខាងក្រោម។ លោកអ្នកអាចចាប់ផ្តើមវាថ្ងៃនេះ។