មេរៀនសំខាន់ទាំង ១២ ពីទស្សនវិជ្ជាស្តូអ៊ិក ដើម្បីភាពជោគជ័យ និងសុភមង្គលក្នុងជីវិត

ការរស់នៅក្នុងពិភពលោកដែលពោរពេញដោយភាពវឹកវរ ការរំខាន និងភាពមិនច្បាស់លាស់ ទស្សនវិជ្ជាបុរាណដែលគេហៅឈ្មោះថា ស្តូអ៊ិក អាចផ្តល់នូវពន្លឺបំភ្លឺមួយ។ ក្នុងន័យជាភាសាខ្មែរ ពាក្យថា ស្តូអ៊ិក មានន័យថា ភាពនឹងថ្កល់។ ស្តូអ៊ិកមិនមែនជាការគាបសង្កត់អារម្មណ៍ ឬការក្លាយជាមនុស្សផ្សេងពីគេនោះទេ ប៉ុន្តែវាគឺជាការពូកែក្នុងការគ្រប់គ្រងខ្លួនឯង ការស្វែងរកភាពស្ងប់សុខ នៅក្នុងពិភពនៃបញ្ហា និងការរស់នៅប្រកបដោយគោលដៅ។ ​ខាងក្រោមនេះគឺជាគោលការណ៍សំខាន់ៗទាំង ១២ ពីទស្សនវិជ្ជាស្តូអ៊ិក​ ដែលអាចជួយអ្នកឲ្យទទួលបាននូវសន្តិភាពខាងក្នុង ភាពរឹងមាំ និងភាពជោគជ័យពិតៗក្នុងជីវិត។

១. ផ្តោតលើអ្វីដែលអ្នកអាចគ្រប់គ្រង

ការពិតមួយដែលផ្តល់សេរីភាពដល់អ្នកក្នុងជីវិត គឺថា អ្នកមិនគ្រប់គ្រងលើអ្វីៗគ្រប់យ៉ាងបាននោះទេ។ អ្នកមិនអាចបញ្ជាអាកាសធាតុ ការយល់ឃើញរបស់អ្នកដទៃ ឬសកម្មភាពរបស់អ្នកដទៃបានទេ។ ទោះជាយ៉ាងណាក៏ដោយ អ្វីដែលអ្នកអាចគ្រប់គ្រងបាននោះគឺការឆ្លើយតប ឬការប្រតិកម្មតបរបស់អ្នក។ អ្នកប្រកាន់ទស្សនវិជ្ជាស្តូអ៊ិកជឿថា ដោយការប្តូរការផ្តោតរបស់អ្នកទៅកាន់អ្វីដែលអ្នកអាចគ្រប់គ្រងបាន ដូចជា សកម្មភាព ការគិត និងឥរិយាបថរបស់អ្នក នោះមានន័យថា អ្នកអាចរំដោះខ្លួនចេញពីទុក្ខសោកខ្លះដែលមិនចាំបាច់។ ចូរដោះលែងនូវភាពមិនសុខទៅលើរឿងដែលនៅក្រៅការគ្រប់គ្រងរបស់អ្នក និងផ្តោតថាមពលរបស់អ្នកទៅលើរឿងដែលសំខាន់សំរាប់អ្នក។

២. ទទួលយករឿងគ្រប់យ៉ាងដែលបានកើតឡើង

ជីវិតមិនអាចកើតឡើងតាមអ្វីដែលយើងបានរំពឹងទុកទាំងអស់នោះទេ។ ជួនកាល យើងជួបប្រទះនូវបញ្ហា ការខូចចិត្ត ឬបរាជ័យ។ ជំនួសឲ្យការប្រឆាំងនឹងការពិត ការគិតបែបស្តូអ៊ិកគឺត្រូវទទួលយកវាយ៉ាងពេញលេញ។ លោក ម៉ាឃឹស អូរីលឹស ដែលជាអធិរាជរ៉ូម៉ាំង និងជាទស្សនវិទូស្តូអ៊ិក ធ្លាប់បាននិយាយថា អ្វីដែលនៅពាំងផ្លូវនឹងក្លាយជាផ្លូវ។ រាល់ការលំបាកបាននាំមកនូវមេរៀន និងឳកាសសំរាប់ការរីកចម្រើន។ ដោយការទទួលយកបញ្ហាក្នុងជីវិត ជាជាងការប្រឆាំងវា អ្នកអាចប្រែក្លាយឧបសគ្គឲ្យទៅជាកាំជណ្តើរដើរឡើងទៅរកភាពជោគជ័យ។

៣. រស់នៅក្នុងបច្ចុប្បន្ន

ទុក្ខសោកភាគច្រើនរបស់យើងគឺចេញមកពីការគិតពីរឿងមិនល្អនៅពេលអតីតកាល និងការបារម្ភពីអ្វីដែលអាចកើតឡើងនៅពេលអនាគត។ ទស្សនវិជ្ជា ស្តូអ៊ិកបង្រៀនថា សន្តិភាពពិតប្រាកដមួយអាចទទួលបានពីការរស់នៅក្នុងបច្ចុប្បន្ន។ នៅពេលដែលអ្នកផ្តោតលើពេលបច្ចុប្បន្នយ៉ាងពេញលេញ អ្នកអាចកាត់បន្ថយនូវអារម្មណ៍តានតឹង និងភាពមិនសុខស្ងប់ដែលមិនចាំបាច់។ មិនថាអ្នកកំពុងធ្វើការ ចំនាយពេលជាមួយមនុស្សជាទីស្រលាញ់ ឬការដើរលេងក្នុងធម្មជាតិជាដើម ចូរដាក់ខ្លួនអ្នកចូលក្នុងពេលបច្ចុប្បន្នឲ្យបានពេញលេញ។

៤. គ្រប់គ្រងអារម្មណ៍របស់អ្នក

អារម្មណ៍គឺជាដំណើរធម្មជាតិ ប៉ុន្តែ ការអនុញ្ញាតិឲ្យវាទៅគ្រប់គ្រងអ្នក គឺអាចបង្កទៅជាការសម្រេចចិត្តដែលមិនល្អ និងបង្កើតជាទុក្ខសោកដែលមិនចាំបាច់។ ជំនួសឲ្យការប្រតិកម្មរហ័សដោយមិនបានគិតទៅកាន់ កំហឹង ភាពភ័យខ្លាច ឬ ទុក្ខសោក ចូរអ្នកថយក្រោយមួយជំហាន​ ហើយសង្កេតអារម្មណ៍របស់អ្នក។ សួរខ្លួនឯងថា តើអារម្មណ៍នេះកំពុងតែជួយអ្នកឬទេ? ដោយការមានវិន័យខ្លួនឯង អ្នកអាចធ្វើការគ្រប់គ្រងទៅលើចិត្ត និងសកម្មភាពរបស់អ្នក ដែលអនុញ្ញាតិឲ្យអ្នកអាចឆ្លើយតបប្រកបដោយសតិ ជាជាងការប្រតិកម្មរហ័សដោយមិនបានគិត។

៥. អនុវត្តការដឹងគុណ

សុភមង្គលមិនមែនរកបាននៅដោយការតាមរកទ្រព្យសម្បត្តិ កេរ្តិ៍ឈ្មោះ ឬ សំភារៈនិយមនោះទេ។ ផ្ទុយទៅវិញ វាអាចរកបានពីការចេះរីករាយនឹងអ្វីដែលអ្នកកំពុងមាន។ អ្នកប្រកាន់ទស្សនវិជ្ជាស្តូអ៊ិកលើកទឹកចិត្តឲ្យយើងអនុវត្តនូវការដឹងគុណជារៀងរាល់ថ្ងៃ ដែលទទួលស្គាល់នូវរឿងល្អៗនៅក្នុងជីវិតរបស់យើង មិនថាវាតូចតាចប៉ុណ្ណា។ នៅពេលដែលអ្នកផ្លាស់ប្តូរការផ្តោតរបស់អ្នកពីអ្វីដែលខ្វះខាតទៅជាអ្វីដែលអ្នកមាន អ្នកនឹងទទួលបានភាពរីករាយ និងភាពពេញចិត្តជាងមុន។

៦. រក្សាគុណធម៌សំរាប់រាល់សកម្មភាព

ទស្សនវិជ្ជាស្តូអ៊ិកមានគោលការណ៍គុណធម៌ ៤ សំខាន់ៗ៖ សតិសម្បជញ្ញៈ ភាពក្លាហាន យុត្តិធម៌ និងភាពអំណត់។ សតិសម្បជញ្ញៈជួយអ្នកឲ្យអាចធ្វើការសម្រេចចិត្តបានល្អ ភាពក្លាហានជួយឲ្យអ្នកអាចប្រឈមនឹងភាពភ័យខ្លាច យុត្តិធម៌ធានាថាអ្នកធ្វើសកម្មភាពដោយមិនបំពានអ្នកដទៃ និងភាពអំណត់បង្រៀនអ្នកពីការគ្រប់គ្រងខ្លួនឯង។ បើសិនជាអ្នកអាចដឹកនាំជីវិតរបស់អ្នកតាមគន្លងនៃគុណធម៌ ៤ នេះ លោកអ្នកនឹងទទួលបាននូវភាពជោគជ័យ និងភាពរីករាយយ៉ាងងាយស្រួល។

៧. កុំខ្លាចភាពលំបាក

ភាពលំបាកក្នុងជីវិតគឺជារឿងជៀសមិនរួច ប៉ុន្តែវាក៏ភ្ជាប់មកជាមួយនូវបំណងផងដែរ។ ការលំបាកទាំងនោះហាត់ពត់អ្នក ធ្វើឲ្យអ្នកខ្លាំង និងបង្រៀននូវភាពរឹងមាំ។ អ្នកប្រកាន់ភ្ជាប់នូវទស្សនវិជ្ជាស្តូអ៊ិកជឿថា ការលំបាកមិនមែនកើតមកដើម្បីកំទេចអ្នកនោះទេ ប៉ុន្តែមកដើម្បីបង្វឹកអ្នកឲ្យខ្លាំងជាងមុន ឆ្លាតជាងមុន។ រាល់ការលំបាកដែលអ្នកជំនះបាន ជួយបន្ថែមកំលាំងខាងក្នុងដល់អ្នក ដែលធ្វើឲ្យអ្នកក្លាយជាមនុស្សដែលគ្មាននរណាអាចបញ្ឈប់បាន។

៨. កុំព្យាយាមស្វែងរកការយល់ស្របពីអ្នកដទៃ

មនុស្សជាច្រើនរស់នៅដោយការស្វែងរកការយល់ស្របពីសង្គម គ្រួសារ ឬមិត្តភក្តិ។ ប៉ុន្តែ សេរីភាពមួយពិតប្រាកដបានមកពីការរស់នៅស្របទៅតាមគោលការណ៍របស់ខ្លួនឯង មិនមែនស្របទៅតាមការរំពឹងទុករបស់អ្នកដទៃឡើយ។ ទស្សនវិជ្ជាស្តូអ៊ិកបានបង្រៀនយើងឲ្យដើរតាមត្រីវិស័យរបស់ខ្លួនឯង ដោយការសម្រេចចិត្តផ្អែកទៅលើសតិសម្បជញ្ញៈ ជាជាងការខ្លាចការគិតរបស់អ្នកដទៃ។

៩. និយាយតិច តែស្តាប់ច្រើន

នៅក្នុងពិភពលោកមួយដែលសំបូរអ្នកចង់តែនិយាយ មានមនុស្សតិចណាស់ដែលតាំងចិត្តស្តាប់ពិតប្រាកដ។ ទស្សនវិជ្ជាស្តូអ៊ិកផ្តល់តម្លៃលើភាពស្ងៀមស្ងាត់ និងការស្តាប់ជ្រាលជ្រៅ ដែលជួយបង្កើតសតិសម្បជញ្ញៈ។ ដោយការសង្កេតច្រើន និងនិយាយតិច អ្នកនឹងយល់កាន់តែច្រើន សម្រេចចិត្តបានល្អជាងមុន និងបង្កើតទំនាក់ទំនងរឹងមាំជាងមុន។

១០. ត្រៀមខ្លួនចំពោះរឿងអាក្រក់បំផុត ប៉ុន្តែសង្ឃឹមចំពោះលទ្ធផលល្អបំផុត

អ្នកប្រកាន់ទស្សនវិជ្ជាស្តូអ៊ិកអនុវត្តវិធីសាស្ត្រមួយដែលមានឈ្មោះថា Premeditatio Malorum ដែលមានន័យថា ការប្រមើលពីករណីដែលអាក្រក់បំផុតដែលអាចកើតឡើងដើម្បីត្រៀមផ្លូវចិត្តសំរាប់ភាពមិនច្បាស់លាស់នៃជីវិត។ ការធ្វើបែបនេះមិនមែនជាការគិតបែបទុតិដ្ឋិនិយមនោះទេ ប៉ុន្តែវានិយាយអំពី​ការកសាងភាពរឹងមាំ។ នៅពេលដែលអ្នកទទួលថា រឿងអាក្រក់អាចនឹងកើតឡើង អ្នកនឹងមិនរងទុក្ខខ្លាំងនៅពេលវាកើតឡើងមែនទែន។ ដូចគ្នានេះដែរ ចូររក្សានូវក្តីសង្ឃឹមជានិច្ច និងព្យាយាមសំរេចលទ្ធផលដែលល្អបំផុតតាមតែអាចធ្វើបាន។

១១. បោះបង់ចោលការជាប់ជំពាក់

ការជាប់ជំពាក់នឹងសំភារៈ ទ្រព្យសម្បត្តិ ទំនាក់ទំនងស្នេហា ឬក៏លទ្ធផលណាមួយ ជាញឹកញាប់តែងនាំទៅរកទុក្ខសោក។ ទស្សនវិជ្ជាស្តូអ៊ិកបង្រៀនយើងថា រាល់អ្វីគ្រប់យ៉ាងនៅក្នុងជីវិតសុទ្ធតែជារបស់មិនទៀងទាត់ បណ្តោះអាសន្ន គឺថា ទ្រព្យសម្បត្តិអាចនឹងបាត់បង់ មនុស្សអាចនឹងចាកចេញ និងស្ថានភាពអាចនឹងផ្លាស់ប្តូរ។ ដោយការផ្តាច់ខ្លួនពីលក្ខខណ្ឌខាងក្រៅ និងការស្វែងរកភាពរីករាយពីខាងក្នុង អ្នកនឹងទទួលបាននូវសន្តិភាព និងសេរីភាពពិតប្រាកដ។

១២. រស់នៅដោយមានគោលដៅ

ជីវិតមួយដែលមានន័យមិនត្រូវបានវាស់វែងដោយសារទ្រព្យសម្បត្តិ ឬឋានៈបុណ្យសក្តិនោះទេ ប៉ុន្តែអាចកំណត់បានដោយការមានគោលដៅពិតប្រាកដ។ ទស្សនវិជ្ជាស្តូអ៊ិកជំរុញយើងឲ្យឧស្សាហ៍សួរខ្លួនឯងថា តើខ្ញុំចង់ផ្លាស់ប្តូរ ឬមានឥទ្ធិពលបែបណា? នៅពេលដែលអ្នកធ្វើសកម្មភាពស្របជាមួយតម្លៃ និងព្យាយាមសម្រេចអ្វីមួយដែលលើសពីខ្លួនឯង អ្នកនឹងទទួលបាននូវសុភមង្គលយ៉ាងជ្រាលជ្រៅ និងភាពជោគជ័យយូរអង្វែង។

ចំណាប់អារម្មណ៍ចុងក្រោយ

ជាចំណាប់អារម្មណ៍ចុងក្រោយ ទស្សនវិជ្ជាស្តូអ៊ិកមិនមែនត្រឹមតែជាទស្សនវិជ្ជាប៉ុណ្ណោះទេ តែវាជារបៀបរស់នៅនៃជីវិតតែម្តង។ ដោយការអនុវត្តគោលការណ៍ទាំង ១២ ខាងលើ អ្នកអាចបង្កើតនូវភាពរឹងមាំផ្នែកផ្លូវចិត្ត ហែលឆ្លងឧបសគ្គនានាក្នុងជីវិតដោយងាយស្រួល និងអាចបង្កើតសុភមង្គលយូរអង្វែងបាន។ ជីវិតជាដំណើរដែលមិនអាចដឹងជាមុន ប៉ុន្តែតាមរយៈការចេះគ្រប់គ្រងខ្លួនឯង អ្នកនឹងអាចស្វែងរកនូវសន្តិភាព និងគោលដៅ បើទោះបីជាជួបរឿងអ្វីក៏ដោយ។ តើគោលការណ៍ដែលអ្នកចូលចិត្តជាងគេខាងលើគឺមួយណា? ចូរអនុវត្តវានៅពេលនេះ ដើម្បីចាប់ផ្តើមប្រែក្លាយជីវិតអ្នកឈានទៅរកភាពជោគជ័យ និងសុភមង្គល ហើយអំនាចក្នុងការផ្លាស់ប្តូរគឺស្ថិតក្នុងដៃអ្នករួចទៅហើយ។