ការគ្រប់គ្រងហិរញ្ញវត្ថុផ្ទាល់ខ្លួនតាមក្បួន ៥០/៣០/២០

ការគ្រប់គ្រងហិរញ្ញវត្ថុផ្ទាល់ខ្លួនជួនកាលវាក៏មានការលំបាកដែរ នៅពេលដែលយើងជួបប្រទះនូវបញ្ហាស្មុគ្រស្មាញផ្នែកចំណូល ចំនាយ ការសន្សំ និងបំណុល។ ប៉ុន្តែយើងមានវិធីសាស្រ្តសាមញ្ញនិងប្រកបដោយប្រសិទ្ធភាពមួយក្នុងការគ្រប់គ្រងលុយរបស់យើង ដែលវិធីសាស្ត្រនោះគឺ ក្បួន ៥០/៣០/២០។ វិធីសាស្ត្រនេះផ្តល់នូវទំរង់ច្បាស់លាស់ក្នុងការបែងចែកចំណូលរបស់យើងជា ៣ ប្រភេទ៖ តម្រូវការចាំបាច់ តម្រូវការបន្ទាប់បន្សំ និង ការសន្សំ។ អត្ថបទនេះនឹងបង្ហាញពីការប្រើប្រាស់វិធីសាស្ត្រនេះក្នុងការគ្រប់គ្រងថវិកាប្រកបដោយប្រសិទ្ធភាព។

១. តើអ្វីទៅជាក្បួន ៥០/៣០/២០?

ក្បួន ៥០/៣០/២០ គឺជាយុទ្ធសាស្ត្រនៃការរៀបចំថវិកាមួយដែលបែងចែកនូវចំណូលបន្ទាប់ពីការបង់ពន្ធរួចទៅជា ៣ ប្រភេទធំៗ៖

• ៥០% សំរាប់តម្រូវការចាំបាច់ដែលអ្នកមិនអាចខ្វះបាន
• ៣០% សំរាប់តម្រូវការបន្ទាប់បន្សំ សំរាប់បង្កើនគុណភាពជីវិតបន្ថែម
• ២០% សំរាប់ការសន្សំ និងការសងបំណុល ដើម្បីកសាងអនាគតហិរញ្ញវត្ថុនិងលុបបំបាត់បំណុល។

ក្បួននេះមានភាពល្បីល្បាញឡើងដោយ សមាជិកព្រឹទ្ធសភាម្នាក់ ឈ្មោះ អេលីហ្សាបែត វ៉ារ៉ិន នៅក្នុងសៀវភៅរបស់គាត់ All Your Worth: The Ultimate Lifetime Money Plan​​​។ ក្បួនរៀបចំលុយនេះមានភាពសាមញ្ញ បត់បែន សំរាប់គ្រប់កំរិតនៃចំណូល និងគ្រប់កំរិតជីវភាព។

២. សេចក្តីលំអិតអំពីក្បួន ៥០/៣០/២០

២.​១ ៥០% សំរាប់តម្រូវការចាំបាច់

តម្រូវការចាំបាច់គឺជាការចំនាយនានាដែលមានសារសំខាន់សំរាប់ការរស់នៅ និងសុខុមាលភាពរបស់អ្នក។ តម្រូវការទាំងនេះមិនអាចខ្វះបានឡើយ ហើយក៏មិនមានការលើកលែងដែរ ហើយតម្រូវការចាំបាច់នេះមិនគួរមានចំនួនលើស ៥០% នៃចំណូលបន្ទាប់ពីពន្ធរបស់អ្នកនោះទេ។ ឧទាហរណ៍នៃការចំនាយទាំងនេះមានដូចជា៖

• ជំរក៖ ការចំនាយលើការជួលផ្ទះ ឬការបង់រំលួសផ្ទះ ពន្ធលើដីធ្លី និងកាចំនាយទឹក ភ្លើង។
• ការធ្វើដំណើរ ឬដឹកជញ្ជូន៖ ការចំនាយលើឡាន សាំង មធ្យោបាយធ្វើដំណើរសាធារណៈ និងធានារ៉ាប់រង។
• គ្រឿងបរិភោគ៖ អាហារចាំបាច់ និងរបស់របរប្រើប្រាស់ក្នុងផ្ទះ។
• ការថែទាំសុខភាព៖ ការបង់ធានារ៉ាប់រង ការព្យាបាលជំងឺ។
• ការបង់បំណុលជាអប្បបរមា៖ ជាចំនួនតិចបំផុតដែលត្រូវបង់បំណុល។

បើសិនជាតម្រូវការចាំបាច់របស់អ្នកលើសពី ៥០% នៃចំនូលរបស់អ្នក វាអាចជាសញ្ញាដែលអ្នកត្រូវកាត់បន្ថយខ្ទង់ចំនាយណាមួយ ឬស្វែងរកមធ្យោបាយដើម្បីកាត់បន្ថយវា ជាឧទាហរណ៍ រើរទៅនៅផ្ទះដែលអស់ថ្លៃទាបជាងមុន ឬការកាត់បន្ថយការចំនាយទឹកភ្លើងជាដើម។

២.២ ៣០% សំរាប់តម្រូវការបន្ទាប់បន្សំ

តម្រូវការបន្ទាប់បន្សំគឺជាការចំនាយទាំងឡាយសំរាប់បង្កើនគុណភាពជីវិតរបស់អ្នក ប៉ុន្តែមិនចាំបាច់នោះទេ។ ប្រភេទចំនាយនេះជួយឲ្យអ្នកអាចរីករាយនឹងជីវិតរបស់អ្នក ខណៈដែលនៅរក្សាក្នុងកំរិតដែលសមហេតុផលមួយ។ ឧទាហរណ៍ខ្លះនៃការចំនាយទាំងនេះមានដូចជា៖

• ការកំសាន្ត៖ ការហូបអាហារក្រៅ ការមើលកុន ការប្រគុំតន្ត្រី និងសកម្មភាពកំសាន្តផ្សេងទៀត
• ការធ្វើដំណើរកំសាន្ត នៅពេលវិស្សមកាល ឬនៅចុងសប្តាហ៍
• ការទិញឥវ៉ាន់៖ សំលៀកបំពាក់ ឧបករណ៍អេឡិចត្រូនិច និងការទិញរបស់មិនចាំបាច់ផ្សេងទៀត
• សេវាកម្មប្រចាំខែ ដូចជាសេវាភាពយន្ត និងកម្មវិធីកំសាន្ត សេវាកម្មខ្លឹបហាត់ប្រាណ និងសេវាកម្មទស្សនាវដ្តី។

គន្លឹះក្នុងការគ្រប់គ្រងប្រភេទចំណូលនេះគឺជាតុល្យភាព។ ​បើទោះបីជាការកំសាន្តមានភាពសំខាន់សំរាប់ជីវិតរីករាយ ការចំនាយច្រើនពេកទៅលើតម្រូវការបន្ទាប់បន្សំអាចធ្វើឲ្យប៉ះពាល់ជាអវិជ្ជមានដល់គោលដៅហិរញ្ញវត្ថុរបស់អ្នក។ បើសិនជាការចំនាយរបស់អ្នកលើប្រភេទចំនាយនេះលើសពី ៣០% អ្នកអាចពិចារណាការធ្វើអទិភាពលើប្រភេទចំនាយ ហើយកាត់បន្ថយទៅលើមុខចំនាយដែលមិនសូវសំខាន់។

២.៣ ២០% សំរាប់ការសន្សំ និងការបង់បំណុល

២០%ចុងក្រោយនៃចំណូលរបស់អ្នកគួរទុកសំរាប់ធានានូវអនាគតហិរញ្ញវត្ថុរបស់អ្នក។ ប្រភេទថវិកានេះមានដូចជា

• ប្រាក់សន្សំ៖ ការសន្សំសំរាប់ភាពអាសន្ន ការសន្សំសំរាប់បង់រំលួស ឬការវិនិយោគដើម្បីចូលនិវត្តន៍។
• ការសងបំណុលលើបំណុលក្រេឌីតកាត បំណុលសិក្សា ឬបំណុលដែលមានការប្រាក់ថ្លៃផ្សេងៗ។
• ការវិនិយោគ៖ ការបង់ចូលគណនេយ្យចូលនិវត្តន៍ ការវិនិយោគភាគហ៊ុន ប័ណ្ណបំណុល ទុនវិនិយោគសមូហភាព ជាដើម។

បើសិនអ្នកមានការលំបាកក្នុងការដាក់ចូលប្រភេទថវិកានេះដល់ ២០% អ្នកអាចចាប់ផ្តើមពីតូចទៅ ហើយបង្កើនវាបន្តិចម្តងៗ។ ថ្វីត្បិតចំនួនតិចតួច តែក្នុងរយៈពេលវែងអ្នកនឹងទទួលបានលទ្ធផលគួរជាទីមោទនៈមួយ ដោយសារតែការធ្វើសមាសកម្មការប្រាក់។

៤. របៀបអនុវត្តក្បួន ៥០/៣០/២០

ដើម្បីអនុវត្តក្បួន ៥០/៣០/២០ នេះ ដំបូងអ្នកត្រូវគណនាចំណូលសរុបរបស់អ្នកបន្ទាប់ពីបង់ពន្ធហើយ។ នេះជាចំនួនសរុបបន្ទាប់ពីបានបង់លើដូចជា ពន្ធលើប្រាក់ចំណូល ការបង់របបសន្តិសុខសង្គម និងការបង់សេវាសុខាភិបាល ជាដើម។​ ចំពោះការបង់ប្រាក់សន្សំចូលនិវត្តន៍ និងការបង់ធានារ៉ាប់រងសុខភាព ត្រូវបូកវាមកក្នុងប្រាក់ចំនូលបន្ទាប់ពីបង់ពន្ធវិញ។ ជំហានទី ២ គឺត្រូវធ្វើការបែងចែកការចំនាយប្រចាំខែរបស់អ្នក ដោយការត្រួតពិនិត្យឡើងវិញនូវការចំនាយ ២ ៣ ខែមុន ហើយបែងចែកវាជា តម្រូវការចាំបាច់ តម្រូវការបន្ទាប់បន្សំ និងការសន្សំឬការបង់បំណុល។ ការធ្វើបែបនេះ នឹងជួយឲ្យអ្នកដឹងនូវលំហូររបស់ប្រាក់ និងកត់សំគាល់នូវកន្លែងដែលអាចធ្វើឲ្យប្រសើរឡើងបាន។ ជំហានទី ៣ គឺ អ្នកត្រូវធ្វើការកែតម្រូវការចំនាយរបស់អ្នក បើសិនការចំនាយនៅពេលបច្ចុប្បន្នរបស់អ្នកមិនត្រូវតាមក្បួន ៥០/៣០/២០នេះ។ ជាឧទាហរណ៍៖ កាត់បន្ថយការចំនាយដែលមិនចាំបាច់ ដូចជាការហូបអាហារខាងក្រៅ ជាដើម ស្វែងរកវិធីកាត់បន្ថយការចំនាយចាំបាច់ ដូចជាការដូរហិរញ្ញប្បទាន ឬការដូរប្រើសេវាកម្មដែលធូរថ្លៃជាង ជាដើម និង ការដាក់សន្សំ ២០% នៃចំណូលដោយស្វ័យប្រវត្តិ។ ជំហានចុងក្រោយនោះគឺការត្រួតពិនិត្យដំណើរការគ្រប់គ្រងថវិការបស់អ្នក ដោយការប្រើប្រាស់កម្មវិធីទូរស័ព្ទ ដើម្បីត្រួតពិនិត្យការចំនាយ និងធានាថាអ្នកកំពុងដើរតាមក្បួន ៥០/៣០/២០បានយ៉ាងត្រឹមត្រូវ។ ត្រួតពិនិត្យ និងធ្វើការកែប្រែបើចាំបាច់។

៥. បញ្ហាប្រឈម និងដំបូន្មានសំរាប់ភាពជោគជ័យ

ក្បួន ៥០/៣០/២០ មើលទៅសាមញ្ញដើម្បីចាប់ផ្តើមអនុវត្ត ប៉ុន្តែវាអាចពិបាកធ្វើ ឬធ្វើមិនបានសំរាប់មនុស្សមួយចំនួន ជាឧទាហរណ៍ ចំពោះអ្នកដែលមានការចាយវាយលើការរស់នៅខ្ពស់ ឬអ្នកដែលមានចំណូលទាប ដែលពិបាកទុកការចំនាយលើតម្រូវការចាំបាច់នៅត្រឹម ៥០%។ អ្នកអាចធ្វើការជំនះបញ្ហានេះដោយការផ្តល់អទិភាពលើតម្រូវការចាំបាច់ គឺថា បើសិនជាតម្រូវការចាំបាច់លើសពី ៥០% អ្នកត្រូវផ្តោតលើការកាត់បន្ថយខ្ទង់ចំនាយក្នុងប្រភេទតម្រូវការបន្ទាប់បន្សំមួយចំនួន។ វិធីម្យ៉ាងទៀតគឺការបង្កើតមុខរបរបន្ទាប់បន្សំបន្ថែមលើចំណូលគោល ឬការឡើងតំណែងការងារដើម្បីបង្កើនប្រាក់ចំណូលរបស់អ្នក។ វិធីចុងក្រោយគឺ ការកែប្រែភាគរយខ្លះៗ គឺថា បើចាំបាច់អ្នកអាចកែប្រែភាគរយបន្តិចបន្តួចដើម្បីឲ្យស៊ីគ្នានឹងស្ថានភាពបច្ចុប្បន្នរបស់អ្នក (ឧទាហរណ៍ ៦០/២០/២០ ជាដើម)

ជាការសន្និដ្ឋាន ក្បួន ៥០/៣០/២០ គឺជាឧបករណ៍គ្រប់គ្រងលើហិរញ្ញវត្ថុរបស់អ្នកដ៏មានប្រសិទ្ធភាព។ ដោយការបែងចែកចំណូលរបស់អ្នកទៅជា តម្រូវការចាំបាច់ តម្រូវការបន្ទាប់បន្សំ និងការសន្សំ អ្នកអាចបង្កើតនូវផែនការហិរញ្ញវត្ថុដែលមានតុល្យភាពមួយ ដែលជួយទ្រទ្រង់ទាំងជីវភាពរស់នៅប្រចាំថ្ងៃ និងគោលដៅទៅថ្ងៃអនាគតរបស់អ្នក។ ត្រូវចងចាំថា ការគ្រប់គ្រងហិរញ្ញវត្ថុមិនជារបស់នៅនឹងថ្កល់នោះទេ អ្នកត្រូវត្រួតពិនិត្យវាឲ្យបានទៀងទាត់ និងធ្វើការកែប្រែផែនការដើម្បីឲ្យអ្នកស្ថិតក្នុងផ្លូវត្រូវមួយជានិច្ច។ ដោយការអនុវត្តប្រកបដោយភាពទៀងទាត់ និងវិន័យ ក្បួន ៥០/៣០/២០ អាចជួយអ្នកសម្រេចបាននូវស្ថិរភាពផ្នែកហិរញ្ញវត្ថុ និងសន្តិភាពផ្លូវចិត្ត។ ចាប់ផ្តើមនៅថ្ងៃនេះ ដោយគណនាចំណូលបន្ទាប់ពីការបង់ពន្ធរបស់អ្នក ហើយបែងចែកប្រភេទការចំនាយរបស់អ្នក។ ជំហានតូចៗនឹងនាំទៅកាន់លទ្ធផលធំក្នុងជីវភាពហិរញ្ញវត្ថុរបស់អ្នក។