ទម្លាប់ពេលព្រឹក ៧ យ៉ាងដែលជួយផ្លាស់ប្តូរជីវិតខ្ញុំ

វាមានភាពខុសគ្នាខ្លាំងរវាងការរស់នៅដែលពោរពេញដោយថាមពល និងការរស់នៅដែលត្រឹមតែរស់ឲ្យផុតមួយថ្ងៃៗ។ ភាពខុសគ្នានោះគឺស្ថិតលើទម្លាប់ប្រចាំថ្ងៃរបស់អ្នក។ អស់រយៈពេលជាច្រើនឆ្នាំដែលខ្ញុំរស់នៅក្នុងភាពស្ត្រេស ខ្វះថាមពល និងខ្វះកំលាំងចិត្ត។ ខ្ញុំតែងតែមានអារម្មណ៍ថា ខ្លួនឯងកំពុងរស់នៅឲ្យផុតមួយថ្ងៃៗប៉ុណ្ណោះ ហើយមិនបានរស់់នៅប្រកបដោយភាពពេញចិត្តចំពោះជីវិតខ្លួនឯងឡើយ។

តែក្រោយមកទើបខ្ញុំបានសិក្សាពីថាមពលនៃទម្លាប់ពេលព្រឹក។ ការផ្លាស់ប្តូរទម្លាប់ពេលព្រឹករបស់ខ្ញុំមិនមែនត្រឹមតែជាការភ្ញាក់ពីព្រឹកព្រលឹម និងផឹកកាហ្វេមួយកែវនោះទេ តែវាជាការអនុវត្តនូវទម្លាប់សំខាន់ៗទាំង ៧ នេះ ដែលបានផ្លាស់ប្តូរជីវិតរបស់ខ្ញុំយ៉ាងច្រើន។​ ខ្ញុំនឹងចែករំលែក ទម្លាប់ទាំង ៧ នេះដល់អ្នកដូចខាងក្រោម។

១. ចាប់ផ្តើមថ្ងៃថ្មីជាមួយការដឹងគុណ

វាមានភាពងាយស្រួលក្នុងការភ្ញាក់ពីគេង ហើយចាប់ផ្តើមគិតពីការងារទាំងពួងដែលត្រូវធ្វើ ប៉ុន្តែការចាប់ផ្តើមថ្ងៃថ្មីជាមួយភាពអវិជ្ជមានគឺជាផ្លូវខុសមួយដែលធ្វើឲ្យអ្នកមានអារម្មណ៍ខ្វះថាមពល និងគ្មានកំលាំងចិត្ត​ពេញមួយថ្ងៃ។ ក្រោយមក ខ្ញុំក៏បានដឹងពីអត្ថប្រយោជន៍នៃការដឹងគុណ។ ការដឹងគុណនេះមិនមែនសំដៅលើតែការនិយាយថា អរគុណ ប៉ុណ្ណោះទេ តែវាជាការដឹងគុណនូវរឿងល្អៗក្នុងជីវិតរបស់អ្នក មិនថាជារឿងហាក់ដូចជាតូចតាចប៉ុណ្ណា។

រៀងរាល់ព្រឹក មុនពេលខ្ញុំក្រោកពីគ្រែគេង ខ្ញុំយកពេលមួយភ្លែតដើម្បីគិតអំពីរឿងល្អៗចំនួន ៣ ដែលខ្ញុំដឹងគុណ។ រឿងទាំងនេះអាចជារបស់ធំៗដូចជា គ្រួសារ និងមិត្តភក្តិ និងជារបស់តូចៗដូចជា អាហារដ៏មានឳជារសដែលអ្នកបានញ៉ាំពីយប់មុន ឬសៀវភៅល្អមួយដែលអ្នកកំពុងអាន ជាដើម។ ការចាប់ផ្តើមថ្ងៃថ្មីជាមួយការដឹងគុណជួយបង្កើនអារម្មណ៍ល្អភ្លាមៗ និងផ្តល់ឲ្យខ្ញុំនូវទស្សនៈវិជ្ជមានសំរាប់ថ្ងៃខាងមុខ។ ចូរចងចាំថា ជីវិតមិនមែនជាការប្រៀបធៀបខ្លួនឯងទៅនឹងអ្នកដទៃនោះទេ តែវាជាការដឹងគុណនូវអ្វីៗដែលយើងកំពុងមាន។ ចូរសាកល្បងធ្វើវាបន្តិចមើល អ្នកនឹងមានការភ្ញាក់ផ្អើលអំពីលទ្ធផលផ្សេងមួយដែលគួរឲ្យកត់សំគាល់។

២. ចាត់បញ្ចូលការហាត់ប្រាណទៅក្នុងទម្លាប់ពេលព្រឹករបស់ខ្ញុំ

ខ្ញុំធ្លាប់តែគិតថា ខ្ញុំមិនមែនជាបុគ្គលព្រឹកព្រលឹម។ ការភ្ញាក់ និងការធ្វើអ្វីមួយដែលមានចលនាខ្លាំងហាក់មិនអាចធ្វើបាន។ បន្ទាប់មក ខ្ញុំក៏សម្រេចចិត្តសាកល្បងតូចមួយ។ ខ្ញុំចាប់ផ្តើមដោយការចំនាយ ២ ៣ នាទី​ ក្នុងការពត់ខ្លួន​​​រាល់ព្រឹក គ្រាន់តែធ្វើឲ្យខ្ញុំមានអារម្មណ៍ស្វាងបន្តិច។

គួរឲ្យភ្ញាក់ផ្អើល ខ្ញុំក៏ដឹងថា គ្រាន់តែការធ្វើបែបនេះបានធ្វើឲ្យខ្ញុំមានអារម្មណ៍ខុសប្លែកពីមុន។ ពេលនោះ ខ្ញុំភ្ញាក់ឡើងដោយមានថាមពលជាងមុន និងមានអារម្មណ៍ធ្វើការល្អជាងមុន។

ដោយឃើញបែបនេះខ្ញុំក៏សម្រេចចិត្តបន្ថែមទម្លាប់នេះទៅជាការហាត់ប្រាណពេញលេញនៅពេលព្រឹកតែម្តង។ ពេលនេះ ខ្ញុំចាប់ផ្តើមថ្ងៃថ្មីដោយការហាត់ប្រាណចន្លោះពី ១៥ ទៅ ៣០ នាទី។ ហើយវាបានក្លាយជាទម្លាប់ដែលខ្ញុំទន្ទឹងចាំជារៀងរាល់ថ្ងៃ ដែលវាជាពេលវេលាដែលខ្ញុំផ្តោតអារម្មណ៍លើខ្លួនឯង និងសុខុមាលភាពរបស់ខ្ញុំ។

ការផ្លាស់ប្តូរពិតជាអស្ចារ្យណាស់។ ការហាត់ប្រាណមិនត្រឹមតែធ្វើឲ្យខ្ញុំភ្ញាក់ឡើងតែផ្លូវកាយប៉ុណ្ណោះទេ តែក៏ភ្ញាក់ឡើងផ្លូវចិត្តផងដែរ។ វាជួយបង្កើតអារម្មណ៍វិជ្ជមានសំរាប់ការងារពេញមួយថ្ងៃ ហើយវាផ្តល់នូវអារម្មណ៍ជោគជ័យមួយនៅពេលព្រឹករួចស្រេចទៅហើយ។

៣. ផឹកទឹកនៅពេលព្រឹក

បន្ទាប់ពីគេងមួយយប់ពេញ រាងកាយរបស់អ្នកប្រាកដជាអស់ជាតិទឹកច្រើន ដូចនេះអ្វីដែលអ្នកត្រូវធ្វើនៅពេលព្រឹកគឺផឹកទឹកមួយកែវបន្ទាប់ពីភ្ញាក់ឡើង។

ទឹកជួយបង្កើតការចម្រាញ់ថាមពលក្នុងរាងកាយរបស់យើង ជួយរាងកាយឲ្យបញ្ចេញចោលនូវសារធាតុពុល និងអាចជួយដល់ការស្រកទំងន់ផងដែរ ហើយវាជាទម្លាប់មួយដែលងាយស្រួលធ្វើផងដែរ។

អ្នកអាចគិតថា កាហ្វេឬតែជាការចាប់ផ្តើមថ្ងៃល្អ ប៉ុន្តែ តាមពិតកាហ្វេវាថែមទាំងធ្វើឲ្យបាត់បង់ជាតិទឹកកាន់តែច្រើនទៅវិញ។​ ដូចនេះវាល្អក្នុងការចាប់ផ្តើមជាមួយទឹកសុទ្ធ រួចបន្តជាមួយភេសជ្ជៈផ្អែម ឬ កាហ្វេជាដើម។

៤. សរសេរបញ្ជីការងារសំរាប់ថ្ងៃថ្មី

ដោយមិនមានផែនការច្បាស់លាស់សំរាប់រាល់ថ្ងៃ វាងាយនឹងមានអារម្មណ៍ថាស្មុគ្រស្មាញ និងគ្មានផលិតកម្មការងារ។ ហេតុនេះហើយទើបអ្វីដែលខ្ញុំធ្វើដំបូងគេនៅពេលព្រឹកគឺការសរសេរកំណត់ត្រានូវបញ្ជីការងារគោលសំរាប់ថ្ងៃថ្មី។ ការសរសេរកំណត់ត្រានេះគឺដើម្បីដឹងថាការងារណាដែលត្រូវធ្វើមុននិងក្រោយ និងគិតទៅលើសមត្ថភាពយើងដែលអាចសម្រេចបាន។

ការមានបញ្ជីមួយដែលយើងអាចកាន់បានអាចផ្តល់ឲ្យយើងនូវគោលបំណងសំរាប់ថ្ងៃនីមួយៗ។ លើសពីនេះ​ វាក៏ផ្តល់អារម្មណ៍រីករាយនៅពេលយើងគូសឆូតនូវការងារដែលយើងបានបំពេញបានជោគជ័យ។

ត្រូវចងចាំថា គោលបំណងនោះមិនមែនជាការបង្កើតនូវបញ្ជីរាយនាមការងារដែលវែងអន្លាយនោះទេ តែជាការផ្តោតលើកិច្ចការដែលសំខាន់ពិតប្រាកដ។ ការដែលធ្វើបែបនេះ ទោះជាក្នុងថ្ងៃរវល់ប៉ុណ្ណា ក៏អ្នកអាចប្រាកដចិត្តថា អ្នកបានចំណាយពេលនិងថាមពលទៅលើការងារ ឬអ្វីៗដែលសំខាន់សំរាប់អ្នក។

៥. ដាក់កំរិតការប្រើប្រាស់ឧបករណ៍បច្ចេកវិទ្យា

នេះជារឿងមួយដែលលំបាកសំរាប់ខ្ញុំ។ ដូចអ្នកដទៃដែរ ខ្ញុំមានទម្លាប់ឆែកទូរស័ព្ទនៅពេលភ្ញាក់ពីគេងភ្លាម ដូចជា អ៊ីម៉េល បណ្តាញសង្គម ព័ត៌មាន ជាដើម ដែលវាជាការធ្វើខួរក្បាលខ្ញុំទទួលព័ត៌មានច្រើនពេក មិនទាំងទាន់បានដុះធ្មេញផង។

ស្រាប់តែខ្ញុំយល់ថា ទម្លាប់នេះបង្កអារម្មណ៍តានតឹងជាងដែលខ្ញុំគិត។ ដោយខ្ញុំមិនបានចាប់ផ្តើមថ្ងៃថ្មីដោយភាពស្ងប់ស្ងាត់ និងការផ្តោតអារម្មណ៍ឡើយ ខ្ញុំត្រូវទទួលនូវព័ត៌មានច្រើនពេក។

ដូចនេះខ្ញុំក៏សម្រេចចិត្តបញ្ឈប់វានៅពេលព្រឹកភ្ញាក់ពីគេង។ ឥឡូវនេះ ពេលវេលាបន្ទាប់ពីភ្ញាក់ពីគេង គឺជាពេលវេលាដែលគ្មានវត្តមានឧបករណ៍បច្ចេកវិទ្យាតែម្តងសំរាប់ខ្ញុំ។

ការផ្លាស់ប្តូរបន្តិចនេះបានផ្តល់ប្រយោជន៍យ៉ាងធំដល់ផលិតភាពការងារ និងអារម្មណ៍ជាទូទៅរបស់ខ្ញុំ។ វាអាចនឹងពិបាកធ្វើនៅពេលដំបូងៗ ប៉ុន្តែចូរជឿជាក់លើខ្ញុំ វាពិតជាមានតម្លៃ។ អ្នកនឹងមានអារម្មណ៍ភ្ញាក់ផ្អើលអំពីឥទ្ធិពលនៃទម្លាប់នេះទៅលើអារម្មណ៍របស់អ្នក។

៦. ញ៉ាំអាហារមានជីវជាតិ

អាហារពេលព្រឹកគឺជាអាហារដែលសំខាន់បំផុតសំរាប់ថ្ងៃនីមួយៗរបស់យើង ហើយវាពិតមែន។ ការចាប់ផ្តើមថ្ងៃមួយប្រកបដោយអាហារដែលមានជីវជាតិពិតជាផ្លាស់ប្តូរជីវិតខ្ញុំមែនទែន។ វាមិនមែនតែការបំពេញពោះខ្ញុំឲ្យតែពេញនោះទេ តែវាជាការទទួលទានជីវជាតិដែលត្រឹមត្រូវដើម្បីឲ្យខ្ញុំមានថាមពល ផ្តោតអារម្មណ៍បានល្អពេញមួយថ្ងៃ។

ជំនួសឲ្យការញ៉ាំនំផ្អែមៗ ខ្ញុំជ្រើសយកអាហារដែលពោរពេញដោយ ប្រូតេអ៊ីន ជាតិសរសៃ និងខ្លាញ់ល្អ​ ដូចជា ពងទា ផ្លែប័រ គ្រាប់ធញ្ញជាតិស្រស់ ផ្លែឈើ។ ដូចនេះហើយ ចូរចំណាយពេលសំរាប់វានៅពេលព្រឹក បើទោះជាអ្នកត្រូវក្រោកលឿនក៏ដោយ។

៧. អនុវត្តការប្រមូលអារម្មណ៍

ការអនុវត្តការប្រមូលអារម្មណ៍គឺជាទម្លាប់តែមួយគត់របស់ខ្ញុំដែលមានឥទ្ធិពលយ៉ាងធំបំផុតមកលើជីវិតខ្ញុំ។

ការប្រមូលអារម្មណ៍គឺជាការផ្ចង់អារម្មណ៍ផ្តោតលើបច្ចុប្បន្នភាព ដោយគ្មានការវិនិច្ឆ័យ ឬការរំខាន។ វាជាការទទួលស្គាល់នូវការគិត និងអារម្មណ៍របស់ខ្លួន ប៉ុន្តែមិនបណ្តោយឲ្យពួកវាមកគ្រប់គ្រងអ្នកឡើយ។

សំរាប់ខ្ញុំវាជាការចាប់ផ្តើមថ្ងៃថ្មីជាមួយការធ្វើសមាធិបន្តិច ត្រឹមតែ ១០ នាទី ដោយភាពស្ងប់ស្ងាត់ និងការដកដង្ហើមវែងៗ ដែលវាពិតជាមានឥទ្ធិពលខ្លាំង។

ការប្រមូលអារម្មណ៍បានជួយឲ្យខ្ញុំទទួលបានការយល់ដឹងយ៉ាងស៊ីជម្រៅពីខ្លួនឯង និងអារម្មណ៍របស់ខ្លួនឯង និងអាចឲ្យខ្ញុំចាប់ផ្តើមថ្ងៃថ្មីប្រកបដោយចិត្តជ្រះថ្លា និងគោលបំណងច្បាស់លាស់។ ចូរសាកល្បងវាមើល វាអាចជាកូនសោរបើកទ្វាររបស់អ្នកទៅកាន់ភាពអស្ចារ្យបាន។