តើភេសជ្ជៈផ្អែម ឬកាហ្វេដែលអ្នកផឹកអាចជំនួសបរិមាណទឹកដែលរាងកាយរបស់អ្នកត្រូវការដែរឬទេ?

ការទទួលទានទឹកប្រចាំថ្ងៃមានសារសំខាន់ណាស់សំរាប់សារពាង្គកាយរបស់អ្នក។ តែជួនកាលអ្នកអាចនឹងឆ្ងល់ថា តែការផឹកទឹកដែលមានសារជាតិផ្អែម ដូចជា កូកាកូឡា កាហ្វេទឹកដោះគោ តែបៃតងទឹកដោះគោ ជាដើម អាចផ្តល់នូវសារជាតិទឹកដែលជំនួសឲ្យការផឹកទឹកសាបប្រចាំថ្ងៃដែរឬទេ? ចម្លើយយ៉ាងខ្លីនោះគឺ មិនអាចទេ ហើយខាងក្រោមនេះជាមូលហេតុ។

១. បរិមាណកាហ្វេអ៊ីនក្នុងកាហ្វេ

កាហ្វេមានផ្ទុកនូវសារធាតុកាហ្វេអ៊ីន ដែលជាសារធាតុជំរុញឲ្យតម្រងនោមផលិតនូវទឹកនោមមានបរិមាណច្រើនជាងធម្មតា។ នេះមានន័យថា កាហ្វេនឹងធ្វើឲ្យមានការផលិតទឹកនោមច្រើនខុសពីធម្មតា ហើយអាចបង្កទៅជាការខ្សោះជាតិទឹក ប្រសិនបើយើងផឹកច្រើនពេក។ ខណៈដែលការផឹកកាហ្វេក្នុងកំរិតល្មម (២ ទៅ ៣ ពែងក្នុងមួយថ្ងៃ) អាចជួយផ្តល់ជាតិទឹកបានខ្លះដែរ ការពឹងលើកាហ្វេសុទ្ធសំរាប់ការផ្តល់សារជាតិទឹកដល់រាងកាយគឺមិនល្អនោះទេ។

២. ជាតិផ្អែម និងសារធាតុបន្ថែម (ភេសជ្ជៈផ្អែម)

ភេសជ្ជៈផ្អែមៗដូចជា សូដា ភេសជ្ជៈប៉ូវកំលាំង ឬទឹកផ្អែម ជាញឹកញាប់មានផ្ទុកសារធាតុស្ករចំនួនច្រើន សារជាតិសិប្បនិម្មិត និងជាប្រភេទកាឡូរីទទេរ។ សារជាតិទាំងនេះអាចបង្កទៅជា ការឡើងទំងន់ ការឡើងសារធាតុផ្អែមក្នុងឈាម និងបញ្ហាសុខភាពផ្សេងទៀត បើសិនមានការទទួលទានលើសលុប។ ជាពិសេស សារជាតិទាំងនេះមិនអាចផ្តល់នូវសារជាតិទឹកដូចគ្នានឹងទឹកធម្មតានោះទេ។

៣. ទឹកធម្មតាមានភាពចាំបាច់

ទឹកធម្មតាគឺជាវិធីបែបធម្មជាតិនិងល្អបំផុតសំរាប់ផ្តល់ជាតិទឹកទៅកាន់រាងកាយអ្នក។ វាគ្មានផ្ទុកសារជាតិកាឡូរី សារជាតិបន្ថែមរសជាតិ ឬពណ៌ ឬក៏បង្កជាផលអវិជ្ជមានណាមួយដល់រាងកាយឡើយ។ រាងកាយរបស់អ្នកត្រូវការពឹងពាក់លើជាតិទឹកសំរាប់មុខងារសំខាន់ៗ ដូចជា ការរក្សាសីតុណ្ណភាពរាងកាយ ការដឹកជញ្ជូនជីវជាតិទៅផ្នែកផ្សេងៗនៃរាងកាយ និងការកំចាត់ចោលជាតិពុលផ្សេងៗពីរាងកាយ។

៤.​ តុល្យភាពជាតិទឹកក្នុងខ្លួន

ខណៈដែលកាហ្វេ និងភេសជ្ជជាតិផ្អែមអាចរាប់ជាប្រភេទជាតិទឹកដែរ អ្នកគួរទទួលទានវាក្នុងបរិមាណល្មមបានហើយ។ ភាគច្រើននៃជាតិទឹកក្នុងខ្លួនរបស់អ្នកគួរបានមកពីទឹកសុទ្ធ តែ ឬភេសជ្ជៈដែលមានបរិមាណកាឡូរីទាប និងមិនមានជាតិកាហ្វេអ៊ីន។

៥. អ្វីដែលគួរធ្វើប្រចាំថ្ងៃ

• ផឹកទឹកធម្មតាឲ្យបានយ៉ាងហោចណាស់ ៦ ទៅ ៨ កែវក្នុងមួយថ្ងៃ។
• បើសិនអ្នកចូលចិត្តញ៉ាំកាហ្វេឬភេសជ្ជៈផ្អែមៗ ត្រូវកំរិតវា ហើយផឹកទឹកឲ្យច្រើនដើម្បីឲ្យមានតុល្យភាព។
• កត់សំគាល់ពីសញ្ញារាងកាយរបស់អ្នក៖ កាលណាអ្នកស្រេកទឹក វាជាសញ្ញាមួយថា អ្នកកំពុងត្រូវការជាតិទឹកបន្ថែម។

សរុបសេចក្តីមក ខណៈដែលកាហ្វេ និងភេសជ្ជៈផ្អែមៗអាចផ្តល់ជាតិទឹកដល់អ្នក ពួកវាមិនគួរយកមកជំនួសទឹកធម្មតានោះទេ​ សំរាប់ផ្តល់ជាតិទឹកដល់សារពាង្គកាយអ្នក។