ការគ្រប់គ្រងបំណុលផ្ទាល់ខ្លួនប្រកបដោយប្រសិទ្ធភាព

ក្នុងបរិបទសេដ្ឋកិច្ចនាពេលបច្ចុប្បន្ន ការគ្រប់គ្រងបំណុលផ្ទាល់ខ្លួនប្រកបដោយប្រសិទ្ធភាពមានសារសំខាន់ណាស់ ក្នុងការរក្សាស្ថិរភាពផ្នែកហិរញ្ញវត្ថុ និងការសម្រេចបាននូវគោលដៅហិរញ្ញវត្ថុក្នុងរយៈពេលវែង។ អត្ថបទនេះនឹងរៀបរាប់ពីគន្លឹះ និងយុទ្ធសាស្ត្រសំខាន់ៗសំរាប់ការកាត់បន្ថយ និងគ្រប់គ្រងបំណុលផ្ទាល់ខ្លួនប្រកបដោយប្រសិទ្ធភាព។

១. ការបង្កើតផែនការសំរាប់ការសងបំណុល

បើសិនជាលោកអ្នកមានបំណុលច្រើន អ្នកអាចចាប់ផ្តើមធ្វើបញ្ជីនៃបំណុលទាំងនោះ ដែលសរសេរអំពីបំណុលទាំងអស់ដែលអ្នកមាន ដូចជា បំណុលឯកជន បំណុលធនាគារ ការបង់រំលោះផ្សេងៗ ជាដើម។ នៅបំណុលនីមួយៗ ចូរសរសេរពី អត្រាការប្រាក់ ការបង់ទាបបំផុត និងកាលបរិច្ឆេទ ដែលត្រូវបង់។ បន្ទាប់មក អ្នកត្រូវធ្វើការផ្តល់អាទិភាពទៅលើបំណុលនីមួយៗ ដោយចាត់ទុកបំណុលដែលមានការប្រាក់ខ្ពស់ជាបំណុលដែលមានអាទិភាពខ្ពស់ជាង ដែលអ្នកត្រូវធ្វើការផ្តោតលើមុនគេ។ ចុងក្រោយ អ្នកត្រូវបង្កើតកាលវិភាគឬកាលកំណត់សំរាប់ការសងបំណុលនីមួយៗ ដោយធ្វើការត្រួតពិនិត្យជាប់ជានិច្ចឲ្យបានទៀងទាត់។ ការបង្កើតតារាងកាលវិភាគសងបំណុលនេះ ត្រូវធ្វើយ៉ាងណាឲ្យអ្នកមានលទ្ធភាពគ្រប់គ្រាន់ក្នុងការសងតាមកាលកំណត់ទាំងនោះ។

២. ការប្រមូលផ្តុំ ឬការប្តូរបំណុល

បើសិនជាអ្នកមានបំណុលច្រើនផ្សេងគ្នា អ្នកអាចធ្វើការប្រមូលផ្តុំបញ្ចូលទៅជាបំណុលតែមួយដែលមានអត្រាការប្រាក់ទាបជាង ដែលការធ្វើបែបនេះជួយឲ្យអ្នកងាយស្រួលក្នុងការបង់តែម្តង និងជួយកាត់បន្ថយចំនួនការប្រាក់ដែលត្រូវបង់ក្នុងរយៈពេលវែង។ វិធីសាស្ត្រមួយទៀត គឺការប្តូរកំចី។ បើសិនអ្នកមានបំណុលដែលមានការប្រាក់ខ្ពស់ អ្នកអាចធ្វើការខ្ចីពីស្ថាប័នផ្សេងដែលមានការប្រាក់ទាបជាង យកទៅបង់ផ្តាច់បំណុលដែលមានការប្រាក់ខ្ពស់ទាំងនោះ ដែលការធ្វើបែបនេះជួយកាត់បន្ថយប្រាក់សំណងប្រចាំខែ និងការប្រាក់សរុប។

៣. ការកាត់បន្ថយការចាយវាយមិនចាំបាច់

ក្នុងការគ្រប់គ្រងបំណុលដែលមានប្រសិទ្ធភាព អ្នកក៏ត្រូវកាត់បន្ថយការចំនាយចាយវាយដែលមិនចាំបាច់ផ្សេងៗផងដែរ ធ្វើយ៉ាងណាឲ្យអ្នកអាចសងបំណុលកាន់តែលឿន កាន់តែល្អ។ ដំបូង អ្នកត្រូវធ្វើការតាមដានការចំនាយប្រចាំថ្ងៃ និងប្រចាំខែរបស់អ្នក ដោយការកត់ត្រានូវរាល់ប្រភេទនៃការចំនាយផ្សេងៗប្រចាំថ្ងៃ និងប្រចាំខែ។ បន្ទាប់មក អ្នកត្រូវកត់សំគាល់នូវប្រភេទការចំនាយណាដែលអ្នកគិតថា អ្នកអាចកាត់បន្ថយបាន ដូចជា ការញ៉ាំអាហារខាងក្រៅ ចំនាយលើការកំសាន្ត ជាដើម។ ម្យ៉ាងទៀត អ្នកក៏អាចកាត់បន្ថយការចាយវាយទៅលើសំភារៈប្រណិតផ្សេងៗដែលមានតម្លៃថ្លៃ ដែលមិនចាំបាច់ខ្លាំងសំរាប់ការរស់នៅ ហើយផ្តោតសំខាន់តែលើការចំនាយចាំបាច់។ រួចអ្នកអាចសារ៉េលុយដែលបានពីការកាត់បន្ថយខាងលើសំរាប់យកទៅសងបំណុលវិញ។ ការរៀបចំផែនការចំណាយក៏មានសារសំខាន់ផងដែរ ដោយអ្នកត្រូវកាត់ចំនូលមួយផ្នែកសំរាប់យកទៅសងបំណុលជារៀងរាល់ខែ ឲ្យបានទៀងទាត់។

៤. ការបង្កើនប្រាក់ចំណូល

ដើម្បីឲ្យការសងបំណុលឲ្យបានឆាប់រហ័ស អ្នកត្រូវព្យាយាមរកប្រភពចំណូលបន្ថែម ក្រៅពីការងារប្រចាំថ្ងៃរបស់អ្នក ដោយការធ្វើការងារក្រៅម៉ោង ឬការងារលក្ខណៈសេរី (Freelance) ឬបង្កើតជំនួញបន្ទាប់បន្សំ​ ដូចជាការលក់អនឡាញ ការធ្វើវីដេអូលើយូធូប តិកតុកជាដើម។ លើសពីនេះ អ្នកអាចពិចារណាលក់ចេញនូវរបស់របរដែលអ្នកមិនត្រូវការប្រើ ដូចជាសំលៀកបំពាក់ គ្រឿងអេឡិចត្រូនិច គ្រឿងសង្ហារឹម ជាដើម ដើម្បីយកលុយនោះទៅសងបំណុល។ ចុងក្រោយ សំរាប់ការងារមានប្រាក់ខែ អ្នកអាចពិចារណាសុំឡើងប្រាក់ខែ ឬទទួលការងារ និងទំនួលខុសត្រូវបន្ថែម ដើម្បីទទួលបានប្រាក់ចំណូលបន្ថែម។

៥. ចរចាជាមួយអ្នកផ្តល់កំចីរបស់អ្នក

ក្នុងករណីដែលអ្នកមានការលំបាកក្នុងការរកប្រាក់ចំណូលមកសងបំណុល អ្នកអាចពិចារណាស្នើសុំកាត់បន្ថយនូវអត្រាការប្រាក់ពីធនាគារ ឬអ្នកផ្តល់កំចីដល់អ្នក ជាពិសេសនៅពេលដែលអ្នកមានប្រវត្តិល្អក្នុងការសងបំណុលទៀងទាត់ ទាន់ពេលវេលា។ ជួនកាល បើអ្នកមានការលំបាកខ្លាំង អ្នកក៏អាចសុំចរចាបង់សងបំណុលដោយចំនួនមិនពេញលេញ ដោយការអនុគ្រោះពីធនាគារ។ លើសពីនេះទៅទៀត បើសិនអ្នកមិនមានថវិកាគ្រប់គ្រាន់ក្នុងការបង់សំរាប់ខែណាមួយ អ្នកអាចចរចាសុំសងបំណុល ឬការប្រាក់សរុបនៅខែបន្ទាប់ ឬពន្យារពេលបង់លុយសងបំណុលរបស់អ្នក ដោយមិនមានការពិន័យ។

៦. ការជៀសវាងការខ្ចីបំណុលថ្មី

ក្នុងការគ្រប់គ្រងបំណុល ប្រការដែលគួរជៀសវាងបំផុតតាមតែអាចធ្វើបាន គឺការបង្កើតបំណុលថ្មីថែមទៀត​។ ដើម្បីដោះស្រាយជាមួយការចំនាយដែលមិនអាចដឹងជាមុន ដូចជាការព្យាបាលជំងឺ ឬការជួសជុលឡាន ជាដើម អ្នកអាចបង្កើតប្រាក់សន្សំសំរាប់ការចំនាយដែលមិនដឹងមុនទាំងនេះ។ ការធ្វើបែបនេះអាចជួយអ្នកជៀសវាងការខ្ចីបំណុលថ្មី នៅពេលអាសន្ន។ វិធីចុងក្រោយ គឺ ការរស់នៅតាមលទ្ធភាព។ ការចាយវាយដើម្បីភាពឡូយឆាយ មើលពីខាងក្រៅដូចជាហំ តាមពិតវាមិនបានជួយដល់ការគ្រប់គ្រងបំណុលមួយដែលមានប្រសិទ្ធភាពនោះទេ វាអាចធ្វើឲ្យជីវភាពរបស់អ្នកកាន់តែយ៉ាប់យ៉ឺនដោយមិនដឹងខ្លួន។ វិធីមួយសំខាន់គឺការធ្វើយ៉ាងណា មិនឲ្យការចំនាយ មានបរិមាណលើស ប្រាក់ចំណូលជាដាច់ខាត ដូចនេះអ្នកគួរកាត់បន្ថយ ឬលុបបំបាត់ការចំនាយលើអ្វីៗដែលមិនចាំបាច់។

៧. ការមានវិន័យនិងភាពអត់ធ្មត់

ចំណុចដែលសំខាន់បំផុតសំរាប់ការគ្រប់គ្រងបំណុលនោះគឺកត្តាខ្លួនឯង។ អ្នកចាំបាច់ត្រូវបង្កើតផែនការគ្រប់គ្រងបំណុលដូចបានរៀបរាប់ខាងលើ បន្ទាប់មក អ្នកត្រូវធ្វើតាមផែនការនោះឲ្យបានខ្ជាប់ខ្ជួន ដោយការមានវិន័យសំរាប់ខ្លួនឯង និងផ្តោតលើគោលដៅជាធំ។ ការសងបំណុលពិតជារឿងដែលលំបាក អ្នកត្រូវតែមានភាពតស៊ូ និងអត់ធ្មត់ក្នុងរយៈពេលវែង ហើយនៅពេលដែលអ្នកសងរួចផ្តាច់បំណុលណាមួយ អ្នកគួរផ្តល់រង្វាន់ឲ្យខ្លួនឯង និងរីករាយនឹងភាពជោគជ័យនេះ។

តាមរយៈយុទ្ធសាស្ត្រ និងគន្លឹះខាងលើ អ្នកអាចគ្រប់គ្រងបំណុលរបស់អ្នកប្រកបដោយប្រសិទ្ធភាព ជាពិសេសវានឹងជួយអ្នកឲ្យចេះគ្រប់គ្រងហិរញ្ញវត្ថុផ្ទាល់ខ្លួនកាន់តែប្រសើរ និងជំរុញឲ្យអ្នកឆ្ពោះទៅកាន់សេរីភាពផ្នែកហិរញ្ញវត្ថុនៅពេលអនាគត។ វាមានសារសំខាន់ណាស់​ដែលអ្នកត្រូវធ្វើវាប្រកបដោយវិន័យខ្លួនឯង ការបង្កើតគោលដៅច្បាស់លាស់ និងការចាត់វិធានការគ្រប់គ្រងបំណុលដោយភាពខ្លាំងក្លា។