ភាពឆ្លាតវ័យផ្នែកផ្លូវអារម្មណ៍ សំរាប់ភាពជោគជ័យនៅកន្លែងការងារ

ភាពឆ្លាតវ័យផ្នែកផ្លូវអារម្មណ៍ (Emotional Intelligence) បានក្លាយជាកត្តាយ៉ាងសំខាន់សំរាប់ភាពជោគជ័យក្នុងអាជីពការងារនាពេលបច្ចុប្បន្ន។ ភាពឆ្លាតវ័យនេះមានភាពសំខាន់ជាងជំនាញបច្ចេកទេស ឬភាពឆ្លាតវ័យផ្នែកប្រាជ្ញាក្នុងការគិតទៅទៀត ដែលជាសមត្ថភាពក្នុងការយល់ ការគ្រប់គ្រង និងជះឥទ្ធិពលទៅលើអារម្មណ៍ ទាំងអារម្មណ៍ខ្លួនឯង និងអ្នកដទៃ។ វាមានសារសំខាន់ដោយសារតែក្នុងបរិបទកន្លែងធ្វើការ វាទាមទារនូវការសហការគ្នា ការសម្របខ្លួន និងភាពជាអ្នកដឹកនាំ។

១. តើអ្វីទៅជា ភាពឆ្លាតវ័យផ្នែកផ្លូវអារម្មណ៍ (Emotional Intelligence)?

ភាពឆ្លាតវ័យផ្នែកអារម្មណ៍គឺជាសមត្ថភាពក្នុងការដឹង យល់ និងគ្រប់គ្រងអារម្មណ៍របស់ខ្លួនឯង ក៏ដូចជាការយល់ និងការជះឥទ្ធិពលទៅលើអារម្មណ៍របស់អ្នកដទៃ ដែលវាជួយជំរុញឲ្យមានការទំនាក់ទំនងល្អប្រសើរ ការប្រាស្រ័យទាក់ទងល្អ និងការសម្រេចចិត្តបានត្រឹមត្រូវ។ ក្នុងបរិបទការងារ សមត្ថភាពគ្រប់គ្រងអារម្មណ៍តែងតែត្រូវបានមើលរំលង ដោយភាគច្រើនគិតថា ចំនេះដឹង និងប្រាជ្ញាស្មារតីក្នុងការគិត មានសារសំខាន់ជាង។ នៅពេលមនុស្សម្នាក់ឲ្យតម្លៃលើចំនេះដឹងជំនាញរបស់ខ្លួនខ្លាំងពេក វាអាចនាំឲ្យគាត់មានអំនួតនៅកន្លែងការងារ ដែលធ្វើឲ្យគាត់ពិបាកក្នុងការចុះសម្រុងជាមួយអ្នកដទៃ ដោយសារនៅកន្លែងការងារ អ្នកមិនអាចដើរទៅមុខម្នាក់ឯងបានទេ វាទាមទារការធ្វើការងារជាក្រុម ការចុះសម្របខ្លួន និងភាពជាអ្នកដឹកនាំ។

ឧទាហរណ៍ ការសិក្សា​នៃ Hay/McBer Research បានរកឃើញថា ភាពឆ្លាតវ័យផ្នែកផ្លូវអារម្មណ៍ដើរតួនាទីរហូតដល់ ៨០% នៅក្នុងភាពជោគជ័យនៃតួនាទីជាអ្នកដឹកនាំ ចំនែកឯជំនាញបច្ចេកទេស និងប្រាជ្ញាស្មារតីដើរតួនាទីតែ ២០% ប៉ុណ្ណោះ។

២. ធាតុផ្សំនៃភាពឆ្លាតវ័យផ្នែកផ្លូវអារម្មណ៍

លោក ដាញ៉ែល ហ្គោលម៉ែន បានកំណត់ធាតុសំខាន់ៗនៃភាពឆ្លាតវ័យផ្នែកផ្លូវអារម្មណ៍​ជា ៥ សំខាន់ៗ។ ទីមួយគឺ ការយល់ដឹងពីអារម្មណ៍ខ្លួនឯង មានន័យថា ការយល់ដឹងពីការប្រែប្រួលរបស់អារម្មណ៍ខ្លួនឯង ព្រមទាំងឥទ្ធិពលនៃអារម្មណ៍ទាំងនោះទៅលើសកម្មភាព និងការសម្រេចចិត្តរបស់ខ្លួន។

ធាតុទី ២ នោះគឺ ការគ្រប់គ្រងអារម្មណ៍ខ្លួនឯង ដែលសំដៅលើការគ្រប់គ្រងការឆ្លើយតបរបស់អារម្មណ៍របស់អ្នកនៅក្នុងស្ថានភាពលំបាកដើម្បីរក្សាភាពនឹងនររបស់ខ្លួន។

ធាតុទី ៣ គឺការលើកទឹកចិត្តខ្លួនឯង សំដៅលើការតស៊ូ អត់ធ្មត់ ក្នុងផ្តោតលើការសម្រេចគោលដៅ បើទោះជាកំពុងជួបឧបសគ្គផ្សេងៗក៏ដោយ។

ទី ៤ គឺការយល់អារម្មណ៍របស់អ្នកដទៃ សំដៅដល់ការយល់ និងការឲ្យតម្លៃទៅលើអារម្មណ៍ និងការយល់ឃើញរបស់អ្នកដទៃ។

ធាតុទី ៥ ដែលជាធាតុចុងក្រោយ គឺ ជំនាញទំនាក់ទំនងសង្គម សំដៅដល់ការកសាងទំនាក់ទំនងរឹងមាំជាមួយអ្នកដទៃ ព្រមទាំងការដោះស្រាយជម្លោះ និងការដឹកនាំប្រកបដោយប្រសិទ្ធភាព។

៣.​ អត្ថប្រយោជន៍នៃភាពឆ្លាតវ័យផ្នែកផ្លូវអារម្មណ៍នៅកន្លែងការងារ

ដើម្បីទទួលបានភាពជោគជ័យក្នុងកន្លែងការងារ ភាពឆ្លាតវ័យផ្នែកផ្លូវអារម្មណ៍ដើរតួនាទីយ៉ាងសំខាន់។ ភាពឆ្លាតវ័យផ្នែកផ្លូវអារម្មណ៍ជួយបង្កើតទំនាក់ទំនងល្អប្រសើរ។ ការមានភាពឆ្លាតវ័យនេះជួយអ្នកឲ្យអាចធ្វើការទំនាក់ទំនងបានច្បាស់លាស់ និងស៊ីសង្វាក់បានល្អ ហើយជួយកាត់បន្ថយការយល់ច្រឡំផ្សេងៗ។

ម្យ៉ាងទៀត ភាពឆ្លាតវ័យផ្នែកផ្លូវអារម្មណ៍ជួយបង្កើតការងារក្រុមបានល្អប្រសើរ។ បុគ្គលិកដែលមានភាពឆ្លាតវ័យផ្នែកផ្លូវអារម្មណ៍ខ្ពស់តែងតែធ្វើការជាក្រុមបានល្អ បង្កើតកិច្ចសហប្រតិបត្តិការ និងទំនុកចិត្តរវាងគ្នានិងគ្នា។

បំនិនផ្នែកភាពជាអ្នកដឹកនាំ គឺជាអត្ថប្រយោជន៍មួយទៀតរបស់ភាពឆ្លាតវ័យផ្នែកផ្លូវអារម្មណ៍។ អ្នកដឹកនាំដែលអស្ចារ្យតែងប្រើប្រាស់ ភាពឆ្លាតវ័យផ្នែកផ្លូវអារម្មណ៍ ក្នុងការជំរុញ និងលើកទឹកចិត្តកូនក្រុមរបស់ពួកគេ ដោះស្រាយទំនាស់បានល្អ និងដោះស្រាយជាមួយបញ្ហាផ្សេងៗបានល្អ។

ម្យ៉ាងទៀត ភាពឆ្លាតវ័យផ្នែកផ្លូវអារម្មណ៍ជួយដល់ការសម្រេចចិត្តបានល្អប្រសើរផងដែរ។ ការយល់ដឹងពីអារម្មណ៍ខ្លួនឯង និងឥទ្ធិពលរបស់វាមកលើការគិតពិចារណារបស់ខ្លួនអាចជួយឲ្យអ្នកដឹកនាំអាចធ្វើការសម្រេចចិត្តប្រកបដោយតុល្យភាព និងគ្រប់ជ្រុងជ្រោយ។

ចុងក្រោយ ភាពរឹងមាំផ្នែកផ្លូវចិត្តក៏ជាអត្ថប្រយោជន៍នៃភាពឆ្លាតវ័យផ្នែកផ្លូវអារម្មណ៍ផងដែរ។ បុគ្គលដែលមានភាពឆ្លាតវ័យផ្នែកផ្លូវអារម្មណ៍ខ្ពស់អាចជួយឲ្យពួកគេអាចទប់ទល់ជាមួយអារម្មណ៍តានតឹង និងសម្របខ្លួនជាមួយបញ្ហាដែលកើតឡើងនៅកន្លែងការងារបានល្អ ដែលភាពរឹងមាំផ្នែកផ្លូវចិត្តនេះនឹងជួយឲ្យពួកគេអាចពង្រឹងជំហររបស់ខ្លួនក្នុងការបន្តការងារដោយផ្តោតលើគោលដៅជាធំ។

៣. របៀបក្នុងការបង្កើននូវភាពឆ្លាតវ័យផ្នែកផ្លូវអារម្មណ៍នៅកន្លែងការងារ

ដូចដែលបានរៀបរាប់ខាងលើ ដើម្បីទទួលបានភាពជោគជ័យក្នុងអាជីពការងារ ឬមុខរបររកស៊ី ភាពឆ្លាតវ័យផ្នែកផ្លូវអារម្មណ៍មានសារសំខាន់ណាស់ ហើយលោកអ្នកមិនគួរមើលរំលងឡើយអំពីកត្តានេះ។ តែជាដំណឹងល្អ អ្នកអាចបង្កើត និងបង្កើននូវភាពឆ្លាតវ័យផ្នែកផ្លូវអារម្មណ៍នៅកន្លែងការងារបានតាមរយៈការអនុត្តផ្ទាល់ ហើយបង្កើតជាទម្លាប់។ ដំបូង អ្នកត្រូវចេះធ្វើការឆ្លុះបញ្ចាំងអំពីខ្លួនឯងដោយទៀងទាត់ ដោយការសំគាល់មើលនូវកត្តាអ្វីដែលបង្កើតអារម្មណ៍របស់អ្នក នឹងថាតើអារម្មណ៍របស់អ្នកនឹងឆ្លើយតបទៅកាន់អារម្មណ៍ទាំងនោះបែបណា។

ទី ២ គឺការអនុវត្តការស្តាប់ប្រកបដោយការយកចិត្តទុកដាក់។ មនុស្សដែលមានភាពឆ្លាតវ័យផ្នែកផ្លូវអារម្មណ៍ខ្សោយតែងតែស្តាប់ដើម្បីឆ្លើយតប តែអ្នកដែលមានភាពឆ្លាតវ័យផ្នែកផ្លូវអារម្មណ៍ខ្លាំងតែងតែយកចិត្តទុកដាក់ក្នុងព្យាយាមយល់នូវអត្ថន័យដែលចេញពីអ្នកនិយាយឲ្យបានច្បាស់លាស់ មុននឹងធ្វើការឆ្លើយតប។

ទី ៣ គឺការអនុវត្តការយល់ពីអ្នកដទៃ ឬការយកចិត្តខ្លួនឯងដាក់ក្នុងចិត្តរបស់អ្នកដទៃដើម្បីអាចយល់ពីអ្នកដទៃបានច្បាស់លាស់។

ការអនុវត្តទី ៤ គឺការទទួលការរិះគន់ស្ថាបនា។ អ្នកគួររៀនបើកចិត្តទៅកាន់ការរិះគន់ស្ថាបនាផ្សេងៗ ហើយប្រើប្រាស់វាដើម្បីធ្វើការកែប្រែខ្លួនឯងឲ្យប្រសើរឡើង។

លំហាត់មួយសំខាន់ដែរគឺការគ្រប់គ្រងភាពតានតឹង ឬស្ត្រេស។ ការចេះគ្រប់គ្រងអារម្មណ៍ស្ត្រេសជួយឲ្យអ្នកអាចកាត់បន្ថយឥទ្ធិពលនៃអារម្មណ៍របស់អ្នកទៅលើសកម្មភាពរបស់អ្នក។ អ្នកអាចអនុវត្តវិធីសាស្ត្រដូចជា ការផ្ចង់អារម្មណ៍ ការសមាធិ ការដកដង្ហើមវែងៗជាដើម ដើម្បីគ្រប់គ្រងអារម្មណ៍របស់អ្នក។

វិធីអនុវត្តចុងក្រោយគឺអភិវឌ្ឍជំនាញក្នុងការដោះស្រាយទំនាស់ ឬជម្លោះ។ ក្នុងការដោះស្រាយទំនាស់ផ្សេងៗក្នុងកន្លែងការងារ អ្នកគួរតែរៀនដោះស្រាយវាប្រកបដោយភាពស្ងប់ស្ងាត់ និងស្វែងរកដំណោះស្រាយឈ្នះៗទាំងសងខាង។

៧. ការលំបាកក្នុងការអភិវឌ្ឍភាពឆ្លាតវ័យផ្នែកផ្លូវអារម្មណ៍នៅកន្លែងការងារ

វាមានការលំបាកខ្លះៗដែលជាឧបសគ្គនៃការអភិវឌ្ឍភាពឆ្លាតវ័យផ្នែកផ្លូវអារម្មណ៍។ ការលំបាកមួយគឺយើងអាចនឹងមានការលំបាកក្នុងការយល់ដឹងពីអារម្មណ៍របស់ខ្លួនឯង និងអ្នកដទៃ។ ម្យ៉ាងទៀត យើងក៏អាចនឹងជួបការលំបាកក្នុងការកែប្រែទម្លាប់នៃការប្រើប្រាស់អារម្មណ៍របស់ខ្លួនឯងផងដែរ ជាពិសេសបើសិនអារម្មណ៍នោះបានឋិតនៅក្នុងខ្លួនអ្នកជាយូរមកហើយ។ លើសពីនេះទៅទៀត វាមានការលំបាកមួយទៀត ទាក់ទងនឹងការធ្វើតុល្យភាពរវាងការបើកចិត្ត និងការរក្សាគោលជំហរជាអ្នកជំនាញអាជីព នៅក្នុងបរិបទការងារដែលពោរពេញដោយភាពតានតឹង។

ដើម្បីជៀសវាងបញ្ហានៃការយល់ខុសពីអារម្មណ៍ខ្លួនឯង និងអ្នកដទៃ​ អ្នកអាចអនុវត្តការឈប់ឬផ្អាកសិន និងគិតពីថាតើអ្នកកំពុងមានអារម្មណ៍បែបណា? ឬតើគាត់កំពុងតែមានអារម្មណ៍បែបណា។ លើសពីនេះ អ្នកអាចអនុវត្តការផ្ចង់អារម្មណ៍ ឬការសរសេរកំណត់ហេតុដើម្បីដឹងពីដំណើរអារម្មណ៍របស់អ្នក និងកត្តាដែលអាចបង្កើតវា។ ម្យ៉ាងទៀត អ្នកអាចរៀនអានភាសាកាយវិការ និងការស្តាប់ប្រកបដោយការយកចិត្តទុកដាក់ដើម្បីយល់ពីអារម្មណ៍របស់អ្នកដទៃ។

ដើម្បីជៀសវាងបញ្ហានៃការលំបាកក្នុងការកែប្រែទម្លាប់ ឬការកែអារម្មណ៍ដែលអ្នកមានមកតាំងពីយូរមកហើយ អ្នកអាចអនុវត្តការផ្លាស់ប្តូរមួយជំហានៗតូចៗ ដោយការជំនួសទម្លាប់មិនល្អ ជាមួយទម្លាប់ល្អជាងមុន។ អ្នកក៏អាចប្រើប្រាស់ APP ដែលជួយតាមដានការបង្កើតទម្លាប់ថ្មីរបស់អ្នកដើម្បីជាជំនួយ។

---

សរុបសេចក្តីមក ភាពឆ្លាតវ័យផ្នែកផ្លូវអារម្មណ៍មានភាពចាំបាច់ណាស់ ក្នុងបរិបទការងារ ដើម្បីជួយបុគ្គលម្នាក់ឲ្យរីកចម្រើន និងជោគជ័យក្នុងអាជីពការងាររបស់ពួកគេ។ ខ្ញុំចង់លើកទឹកចិត្តដល់មិត្តអ្នកអានឲ្យចាត់ទុកភាពឆ្លាតវ័យផ្នែកផ្លូវអារម្មណ៍ជាជំនាញមួយដែលយើងអាចបង្កើតឡើងជាបណ្តើរៗ ហើយវាមិនមែនជាចរិតលក្ខណៈដែលមានពីកំណើតនោះទេ។ អ្នកត្រូវចាំថា “ភាពឆ្លាតវ័យផ្នែកផ្លូវអារម្មណ៍របស់អ្នកគឺជាមូលដ្ឋានគ្រឹះនៃការកសាងទំនាក់ទំនង អាជីពការងារ និងសុភមង្គលក្នុងជីវិតរបស់អ្នក”។