របៀបរស់នៅក្នុងជីវិតមួយដ៏អស្ចារ្យ

សៀវភៅដែលមានចំណងជើងថា របៀបរស់នៅក្នុងជីវិតមួយដ៏អស្ចារ្យ ត្រូវបាននិពន្ធឡើងដោយលោក អាន់ថូនី ផុំភ្លីអាណូ។ សៀវភៅនេះគឺជាអត្ថន័យដែលប្រមូលចេញពីសំបុត្រតូចៗចំនួន ៦៥ សំបុត្រដែលគាត់សរសេរដើម្បីទុកប្រៀនប្រដៅកូនរបស់គាត់ ដែលជាមេរៀនជីវិតដ៏មានប្រយោជន៍បំផុតតាមរយៈបទពិសោធន៍របស់គាត់ ជាទាហានម្នាក់ សហគ្រិនមួយរូប និងអ្នកវិនិយោគមួយរូបផងដែរ។ សៀវភៅនេះផ្តល់នូវដំបូន្មានដ៏ល្អក្នុងការសំរេចបាននូវភាពជោគជ័យ ការបង្កើតទំនាក់ទំនងល្អជាមួយអ្នកដទៃ ការគ្រប់គ្រងហិរញ្ញវត្ថុផ្ទាល់ខ្លួន និងការសម្រេចបាននូវភាពរីករាយក្នុងជីវិត។ ខាងក្រោមគឺជាអត្ថន័យសង្ខេបចេញពីសៀវភៅនេះ។

---

១. ការរស់នៅជាមួយភាពស្មោះត្រង់៖ ការធ្វើសកម្មភាពស្របជាមួយតម្លៃរបស់អ្នក

ស្នូលដ៏សំខាន់នៃជីវិតដ៏អស្ចារ្យគឺជាការអនុវត្តនូវការរស់នៅប្រកបដោយភាពស្មោះត្រង់។ អ្នកនិពន្ធបានបញ្ជាក់ថា ភាពស្មោះត្រង់គឺជាការគោរពយ៉ាងខ្ជាប់ខ្ជួនចំពោះតម្លៃស្នូល និងគោលការណ៍សីលធម៌របស់ខ្លួន បើទោះបីជាត្រូវប្រឈមនឹងការសម្រេចចិត្តដ៏លំបាក ឬសំពាធខាងក្រៅក៏ដោយ។ ដោយការសម្រេចចិត្តប្រកបដោយភាពពិតប្រាកដមួយ យើងអាចដឹកនាំជីវិតមួយប្រកបដោយភាពច្បាស់លាស់ និងគោលដៅ។ គាត់បានផ្តល់ដំបូន្មានឲ្យអ្នកអានរបស់គាត់ឲ្យធ្វើការសម្របខ្លួនជានិច្ចទៅនឹងការពិតថ្មីៗ និងកាលៈទេសៈដែលផ្លាស់ប្តូរ ខណៈដែលយើងត្រូវតែគោរពតាមគោលការណ៍សីលធម៌របស់ខ្លួនឯងជានិច្ច។ តុល្យភាពរវាងការប្តេជ្ញាចិត្តខ្ពស់ និងការចេះបត់បែន អាចជួយញ៉ាំងឲ្យបុគ្គលម្នាក់អាចលូតលាស់ ដោយគ្មានការផ្លាស់ប្តូរចរិតលក្ខណៈរបស់ខ្លួន។

២. ការប្រកាន់ភ្ជាប់នូវភាពរឹងមាំតាមរយៈជំហានតូចៗ

ដោយទាញយកបទពិសោធន៍របស់គាត់ក្នុងការងារជាទាហាន និងសហគ្រិន លោក​ ផុំភ្លីអាណូ បញ្ជាក់ពីភាពសំខាន់របស់ភាពរឹងមាំក្នុងការជំនះនូវឧបសគ្គរបស់ជីវិតដែលអ្នកមិនអាចជៀសផុត។ គាត់ជឿថា ភាពរឹងមាំមិនមែនកើតឡើងដោយការធ្វើសកម្មភាពធំៗនោះទេ តែវាត្រូវបានបង្កើតឡើងដោយសកម្មភាពតូចៗដែលអ្នកធ្វើដដែលៗ ដែលវាត្រូវបានបង្កើតឡើងដោយការខំប្រឹង និងវិន័យខ្លួនឯងក្នុងរយៈពេលមួយ។ មិនថាបញ្ហាទាក់ទងនឹងការធ្វើគម្រោងការណាមួយ ឬការក្រោកឈរឡើងវិញពីវិបត្តិផ្សេងៗនោះទេ ការផ្តោតលើភាពលំអិតតូចៗ និងការប្តេជ្ញាចិត្តចំពោះការរីកចម្រើនបន្តិចម្តងៗនឹងជួយបង្កើតនូវទំនុកចិត្ត និងត្រៀមខ្លួនសំរាប់បុគ្គលម្នាក់ៗដែលនឹងត្រូវជួបបញ្ហាធំៗជាងនេះ។ ទស្សនៈរបស់លោក ផុំភ្លីអាណូ អំពី ជំហានតូចៗនាំទៅកាន់លទ្ធផលធំ ផ្តល់ថាមពលទៅកាន់អ្នកអានក្នុងការតស៊ូ អត់ធ្មត់ បើទោះបីជាពួកគេត្រូវជួបឧបសគ្គលំបាកៗយ៉ាងណាក៏ដោយ។

៣. ការបង្កើតទំនាក់ទំនងល្អ

ភាពជោគជ័យ និងភាពរីករាយមានទំនាក់ទំនងយ៉ាងស៊ីជម្រៅជាមួយគុណភាពនៃទំនាក់ទំនងរបស់បុគ្គលម្នាក់ៗជាមួយអ្នកដទៃ។ លោក​ ផុំភ្លីអាណូ ផ្តល់ដំបូន្មានថា អ្នកត្រូវសេពគប់ជាមួយមនុស្សដែលនិយាយត្រង់ គឺមនុស្សដែលផ្តល់ការរិះគន់ស្មោះត្រង់ ហើយលើកទឹកចិត្តអ្នកឲ្យធ្វើការកែប្រែ។ គាត់ក៏លើកឡើងពីសារសំខាន់នៃការផ្តល់ឲ្យគ្នាទៅវិញទៅមក ក្នុងទំនាក់ទំនង ដែលលើកទឹកចិត្តឲ្យអ្នកអានចេះធ្វើជាគម្រូ និងបង្ហាញនូវគុណសម្បត្តិដែលពួកគេឲ្យតម្លៃចំពោះអ្នកដទៃ។ ការបង្កើតទំនុកចិត្ត ការគោរព និងការគាំទ្រគ្នាទៅវិញទៅមក គឺមានសារសំខាន់ណាស់សំរាប់ការបង្កើតបណ្តាញទំនាក់ទំនងដ៏មានតម្លៃ។ មិនថាក្នុងទំនាក់ទំនងផ្ទាល់ខ្លួន ឬទំនាក់ទំនងបែបការងារ ការបង្កើតចំណងបែបនេះជួយបង្កើតនូវមូលដ្ឋានគ្រឹះសំរាប់ជីវិតពោរពេញដោយភាពរីករាយ និងការរីកចម្រើន។

៤. ការសម្រេចគោលដៅដោយឆន្ទៈ និងសកម្មភាព

លោក​ ផុំភ្លីអាណូ មិនលើកទឹកចិត្តសំរាប់ការរង់ចាំពេលវេលាល្អឥតខ្ជោះដើម្បីសម្រេចគោលដៅនោះទេ។ ផ្ទុយទៅវិញ គាត់គាំទ្រការធ្វើសកម្មភាព មិនថាតិចតួចប៉ុណ្ណា ធ្វើការសម្របខ្លួនបណ្តើរៗក្នុងដំណើរការនោះ។ ដោយការចាប់ផ្តើមពេលនេះ និងផ្តោតលើការខំប្រឹងជានិច្ច អ្នកអាចបង្កើននូវសន្ទុះ និងជំនះនូវឧបសគ្គដែលមករារាំង។ គាត់ក៏បញ្ជាក់ផងដែរ អំពីភាពសំខាន់នៃការសម្របគោលដៅទៅនឹងចំណង់ចំណូលចិត្ត និងចំណុចខ្លាំងរបស់អ្នក។ ការធ្វើសកម្មភាពប្រកបដោយឆន្ទៈមិនត្រឹមតែបង្កើនឳកាសនៃភាពជោគជ័យប៉ុណ្ណោះទេ តែវាថែមទាំងធានាថា ការសម្រេចគោលដៅរបស់អ្នកក៏នាំមកនូវភាពពេញចិត្តដ៏ពិតប្រាកដមួយផងដែរ។

៥. ការធ្វើតុល្យការការងារ និងសុខុមាលភាព

ជីវិតមួយដ៏អស្ចារ្យទាមទារនូវតុល្យភាព ជាពិសេសពាក់ព័ន្ធនឹងការងារ និងសុខុមាលភាព។ លោក​ ផុំភ្លីអាណូ បញ្ជាក់ពីភាពសំខាន់នៃការថែរក្សាទាំងសុខភាពផ្លូវកាយ និងផ្លូវចិត្ត ដោយកត់សំគាល់ថា សុខភាពផ្លូវកាយ និងចិត្តគឺជាមូលដ្ឋានគ្រឹះនៃភាពជោគជ័យ និងភាពរីករាយជានិរន្តរ៍។ ដោយការធ្វើជីវិតឲ្យសាមញ្ញ និងកាត់បន្ថយនូវរឿងរំខានផ្សេងៗដែលមិនចាំបាច់ អ្នកអាចផ្តោតលើអ្វីដែលជាអទិភាព។ ការបង្កើតទម្លាប់ដែលទាក់ទងនឹង ការហាត់ប្រាណ ធ្វើចលនា ការផ្ទង់អារម្មណ៍ឲ្យមូល ការគេងគ្រប់គ្រាន់ និងការថែរក្សាខ្លួនឯង អាចធានាថា អ្នកនឹងមានថាមពល និងភាពច្បាស់លាស់ ចាំបាច់សំរាប់ការដោះស្រាយបញ្ហារបស់ជីវិតផ្សេងៗ។

៦. សេរីភាពផ្នែកហិរញ្ញវត្ថុតាមរយៈការគិតបែបយុទ្ធសាស្ត្រ

លោក​ ផុំភ្លីអាណូ ទាញយកពីបទពិសោធន៍របស់គាត់ជាអ្នកវិនិយោគ ដើម្បីផ្តល់នូវដំបូន្មានល្អៗក្នុងការសម្រេចបាននូវភាពឯករាជ្យផ្នែកហិរញ្ញវត្ថុ។ គាត់លើកទឹកចិត្តអ្នកអានឲ្យចេះគិតបែបរយៈពេលវែង នៅពេលដែលអ្នកគិតអំពីការរៀបចំហិរញ្ញវត្ថុ និងការវិនិយោគ ដោយផ្តោតលើការរីកលូតលាស់ដែលមានចីរភាព និងការវិនិយោគដ៏ប្រុងប្រយ័ត្ន។ ការគិត និងការធ្វើផែនការបែបយុទ្ធសាស្ត្រមានសារសំខាន់ណាស់សំរាប់ការគ្រប់គ្រងធនធានប្រកបដោយប្រសិទ្ធភាព និងការចាប់យកឳកាសនានា។ លោក​ ផុំភ្លីអាណូ ជឿថា សេរីភាពផ្នែកហិរញ្ញវត្ថុមិនមែននិយាយអំពីការប្រមូលប្រាក់ឲ្យបានច្រើនតាមតែអាចធ្វើបាននោះទេ តែវានិយាយអំពីការបង្កើតសេរីភាពក្នុងការរស់នៅក្នុងជីវិតតាមចំណង់ចំណូលចិត្តខ្លួនឯង។

៧. ការអភិវឌ្ឍសមត្ថភាពខ្លួនឯងជានិច្ច

គំនិតស្នូលមួយនៃទស្សនៈរបស់ លោក​ ផុំភ្លីអាណូ គឺជាសារសំខាន់នៃការសិក្សាពេញមួយជីវិត និងការសម្របខ្លួន។ គាត់លើកទឹកចិត្តអ្នកអានឲ្យចាត់ទុកបញ្ហាប្រឈមនានាជាឳកាសសំរាប់ការរីកចម្រើន និងត្រូវបើកគំនិតចំពោះទស្សនៈថ្មីៗ។ តាមរយៈការទទួលបានចំនេះដឹងជានិច្ច និងការព្យាយាមអភិវឌ្ឍខ្លួនឯង បុគ្គលម្នាក់ៗអាចត្រៀមខ្លួនបានល្អសំរាប់ការផ្លាស់ប្តូរនានាក្នុងជីវិត និងរក្សានូវដំណើរជីវិតដែលប្រកបដោយឆន្ទៈ។ ផ្នត់គំនិតបែបលូតលាស់នេះជួយបង្កើតភាពរឹងមាំ ការចេះបត់បែន និងការឲ្យតម្លៃទៅលើដំណើរជីវិតរបស់ខ្លួន។

---

ការរស់នៅប្រកបដោយទិសដៅ និងភាពពេញចិត្ត

មេរៀនជីវិតរបស់ លោក​ ផុំភ្លីអាណូ មានទំនាក់ទំនងយ៉ាងជ្រៅជាមួយបទពិសោធន៍ជីវិតផ្ទាល់របស់គាត់ ដែលធ្វើឲ្យមេរៀនទាំងនេះមានលក្ខណៈពាក់ព័ន្ធ និងអាចអនុវត្តបានសំរាប់សំណាក់អ្នកអានពីគ្រប់ស្រទាប់សង្គម។ តាមរយៈគោលគំនិតសំខាន់ៗទាំង ៧ (ភាពស្មោះត្រង់ ភាពរឹងមាំ ទំនាក់ទំនង សកម្មភាពប្រកបដោយឆន្ទៈ សុខុមាលភាព សេរីភាពហិរញ្ញវត្ថុ និងការលូតលាស់) លោក​ ផុំភ្លីអាណូ​ បានបង្ហាញនូវផ្លូវជីវិតយ៉ាងច្បាស់ក្នុងការរស់នៅក្នុងជីវិតមួយដ៏អស្ចារ្យ។ ការអនុវត្តតាមគោលការណ៍ទាំងនេះនឹងជួយឲ្យអ្នកអាចហែលឆ្លងបញ្ហាលំបាកនានា សំរេចបាននូវគោលដៅជីវិត និងបង្កើតជីវិតមួយជាទីពេញចិត្តសំរាប់ខ្លួនឯងបំផុត។ អ្នកត្រូវចងចាំថា ការរស់នៅជីវិតដ៏អស្ចារ្យពុំទាមទារនូវភាពល្អឥតខ្ជោះ ឬភាពជោគជ័យមហាយក្សអ្វីនោះទេ វាគឺនិយាយអំពីការសម្រេចចិត្តយកជម្រើសប្រកបដោយឆន្ទៈ ការអោបក្រសោបនូវភាពរីកចម្រើន និងការគោរពតាមគោលការណ៍តម្លៃរបស់ខ្លួនឯងជានិច្ច។