ទស្សនៈវិជ្ជា ខៃហ្សិន (Kaizen) និងការអនុវត្តសំរាប់ការអភិវឌ្ឍខ្លួនឯង

ខៃហ្សិន ដែលជាពាក្យជប៉ុន មានន័យថា ការធ្វើឲ្យប្រសើរឡើងជានិច្ច គឺជាទស្សនវិជ្ជាដ៏មានប្រយោជន៍មួយដែលផ្តល់ភាពសំខាន់ទៅលើការផ្លាស់ប្តូរបន្តិចម្តងៗជាបណ្តើរឆ្ពោះទៅកាន់ភាពរីកចម្រើនក្នុងរយៈពេលវែង។ ខៃហ្សិន បើទោះជាត្រូវបានគេអនុវត្តយ៉ាងទូលំទូលាយក្នុងបរិបទជំនួញ និងផលិតកម្មក៏ដោយ ក៏គោលការណ៍របស់វាក៏មានប្រយោជន៍ខ្លាំងក្នុងការកែប្រែជីវិតបុគ្គលម្នាក់ឆ្ពោះទៅរកភាពរីកចម្រើនផងដែរ។ ដោយការអនុវត្ត ខៃហ្សិន នៅក្នុងទម្លាប់ប្រចាំថ្ងៃ យើងអាចបង្កើតនូវផ្នត់គំនិតអំពីការអភិវឌ្ឍខ្លួនឯងជានិច្ចនិរន្តរ៍ ដែលនាំទៅរកផលិតភាពការងារដ៏អស្ចារ្យ សុខុមាលភាព និងសុភមង្គល។

អត្ថបទនេះនឹងរៀបរាប់អំពីគោលការណ៍នានារបស់ ខៃហ្សិន និងរបៀបដែលយើងអាចអនុវត្តវាក្នុងជីវិតប្រចាំថ្ងៃ ដើម្បីបង្កើតការផ្លាស់ប្តូរជាវិជ្ជមានក្នុងរយៈពេលវែង។

១. គោលការណ៍សំខាន់ៗនៃខៃហ្សិន

ខៃហ្សិនមានមូលដ្ឋានគ្រឹះរបស់វាឋិតលើគោលការណ៍សំខាន់ៗមួយចំនួនសំរាប់យកមកអនុវត្ត។ គោលការណ៍ទាំងនេះមានលក្ខណៈសាកលដែលយើងអាចយកមកអនុវត្តសាកសមសំរាប់គោលដៅ និងរបៀបរបបរស់នៅរបស់យើងម្នាក់ៗ។

ការធ្វើឲ្យប្រសើរឡើងជានិច្ច៖ ខៃហ្សិនលើកទឹកចិត្តឲ្យមានការប្តេជ្ញាចិត្តពេញមួយជីវិតចំពោះការអភិវឌ្ឍខ្លួនឯង។ វាពាក់ព័ន្ធនឹងការស្វែងយល់អំពីលក្ខខណ្ឌជីវិតផ្សេងៗរបស់អ្នក ហើយនិងការចាត់វិធានការជាជំហានតូចៗដើម្បីកែប្រែវា។

ការចាប់ផ្តើមពីជំហានតូចៗ៖ ខៃហ្សិនមិនផ្តោតលើការផ្លាស់ប្តូរធំសំបើមនោះទេ តែវាផ្តោតលើការកែប្រែតិចៗដែលយើងអាចធ្វើបាន។ ការផ្លាស់ប្តូរជាជំហានតូចៗ និងទៀតទាត់ មានលក្ខណៈចីរកាលជាង និងមិនធ្វើឲ្យយើងមានអារម្មណ៍តានតឹង។

ការលុបបំបាត់ភាពខ្ជះខ្ជាយ៖​ នៅក្នុងភាសាជប៉ុនគេហៅថា មូដា និយមន័យនៃពាក្យ ភាពខ្ជះខ្ជាយ គឺសំដៅលើអ្វីៗដែលមិនផ្តល់តម្លៃ ឬ ឥតប្រយោជន៍។ នៅក្នុងជីវិតប្រចាំថ្ងៃ នេះអាចសំដៅលើ ការលុបចោលនូវទម្លាប់មិនល្អដែលធ្វើឲ្យខាតពេល ភាពរញ៉េរញ៉ៃទើសមុខទើសមាត់ ឬសកម្មភាពណាដែលខ្ជះខ្ជាយពេលវេលាឥតប្រយោជន៍។

ការផ្តោតលើដំណើរការ៖ ខៃហ្សិនចង់បញ្ជាក់ពីការធ្វើឲ្យប្រសើរឡើងនូវដំណើរការតូច ឬជំហានតូច ជាជាងផ្តោតលើលទ្ធផលដែលនៅខាងចុង។ ដោយការផ្តោតលើទម្លាប់ល្អប្រចាំថ្ងៃ យើងអាចសម្រេចនូវលទ្ធផលល្អប្រសើរជាងក្នុងរយៈពេលវែង។

វិន័យខ្លួនឯង៖ ស្នូលសំខាន់នៃខៃហ្សិន គឺការប្តេជ្ញាចិត្ត និងនិរន្តរភាព។ ការអនុវត្តនូវវិន័យខ្លួនឯង គឺនឹងធានាថា ការផ្លាស់ប្តូរតូចៗដែលអ្នកធ្វើរាល់ថ្ងៃនឹងនាំទៅកាន់ការរីកចម្រើនដ៏មានន័យ។

ការសាទរនូវភាពជោគជ័យ៖ ការស្គាល់ និងអបអរសាទរអំពីភាពជោគជ័យតូចៗនឹងជួយពង្រឹងនូវទម្លាប់នៃការធ្វើឲ្យប្រសើរឡើងជានិច្ច និងជំរុញទឹកចិត្តឲ្យយើងបន្តនូវដំណើរបែបនេះទៅមុខរហូត។

២. ការអនុវត្តខៃហ្សិនក្នុងជីវិតពិត

ខៃហ្សិន ជាទស្សនវិជ្ជាមួយដែលអាចអនុវត្តបានច្រើនកន្លែង​ហើយគោលការណ៍សំខាន់ៗរបស់វាអាចយកទៅអនុវត្តក្នុងផ្នែកផ្សេងៗនៃជីវិតយើង ដូចជា ផ្នែកសុខភាព ទំនាក់ទំនង ផលិតភាពការងារ និងសុខុមាលភាពផ្លូវចិត្ត។​ ខាងក្រោមនឹងរៀបរាប់អំពីវិធីសាស្ត្រអនុវត្តមួយចំនួនសំរាប់ខៃហ្សិននៅក្នុងទម្លាប់ជីវិតប្រចាំថ្ងៃ។

២.១​ សុខភាពផ្លូវកាយ

មនុស្សជាច្រើនតែងមានបំណងចង់កែលម្អសុខភាព និងសំរកទំងន់ ប៉ុន្តែបើសិនយើងចាប់ផ្តើមធ្វើវាខ្លាំងក្លាពេក វាអាចធ្វើឲ្យយើងឆាប់ធុញ នឿយណាយ។ តាមរយៈខៃហ្សិន វាផ្តល់នូវរបៀបអនុវត្តដែលមានចីរភាពជាងនេះ។ ឧទាហរណ៍ អ្នកអាចចាប់ផ្តើមសាកដើរហាត់ប្រាណ ៥ នាទី ក្នុងមួយថ្ងៃ ហើយបន្តបង្កើនរយៈពេលបន្តិចម្តងៗ។ អ្នកអាចជំនួសអាហារដែលមិនល្អសំរាប់សុខភាពដោយអាហារដែលផ្តល់សុខភាពជាង មួយអាទិត្យធ្វើឲ្យបានមួយ។ អ្នកអាចសាកចំនាយពេល ២ នាទីបន្ទាប់ពីក្រោកពីដំណេកដើម្បីពត់ខ្លួនឲ្យមានភាពបត់បែនល្អជាងមុន។ ការធ្វើបែបនេះជារៀងរាល់ថ្ងៃ នឹងបង្កើតលទ្ធផលគួរឲ្យកត់សំគាល់សំរាប់សុខភាពផ្លូវកាយរបស់អ្នក។

២.២ ផលិតភាពការងារ

ផលិតភាពការងារអាចត្រូវបានបង្កើនបានដោយការធ្វើទម្លាប់ល្អជារៀងរាល់ថ្ងៃ និងការរៀបចំការងារប្រកបដោយប្រសិទ្ធភាព។ ឧទាហរណ៍នៃការអនុវត្តមានដូចជា៖

• ចាប់ផ្តើមថ្ងៃថ្មីរបស់អ្នក ដោយកំណត់នូវការងារអទិភាពចំនួន ៣ ដែលអ្នកត្រូវផ្តោត
• ទុកពេល ១០ នាទីសំរាប់ការរៀបចំបន្ទប់ ឬកន្លែងធ្វើការរបស់អ្នកនៅរាល់ពេលល្ងាច
• ប្រើប្រាស់តិចនិច ផូម៉ូដូរូ (Pomodoro) ដើម្បីផ្តោតលើការងារមួយរយៈពេល (២៥ នាទី) រួចដកឃ្លាមកសំរាកក្នុងរយៈពេលខ្លី (៥ នាទី) មុននឹងចាប់ផ្តើមការងារបន្តទៀត។

វិធីដូចឧទាហរណ៍ខាងលើនេះអាចជួយកាត់បន្ថយការពន្យារពេលក្នុងការធ្វើការ និងបង្កើនប្រសិទ្ធផលការងារដោយមិនមានអារម្មណ៍ហត់នឿយ។

២.៣ សុខភាពផ្លូវចិត្ត

ខៃហ្សិនជួយជំរុញអ្នកឲ្យធ្វើសកម្មភាពជាជំហានតូចៗដើម្បីបង្កើនសុខភាពផ្លូវចិត្ត និងភាពរឹងមាំរបស់អ្នក។ ជាឧទាហរណ៍៖

• ចំនាយពេល ២ នាទីក្នុងមួយថ្ងៃដើម្បីអនុវត្តការដកដង្ហើមវែងៗ ឬការផ្ចង់អារម្មណ៍
• សរសេរវត្ថុម្យ៉ាងដែលអ្នករីករាយជាមួយសំរាប់ថ្ងៃនីមួយៗនៅរាល់ពេលល្ងាច
• ការបន្ថយជាបណ្តើរៗនូវការមើលទូរស័ព្ទមុនពេលគេង ៥ នាទីក្នុងមួយយប់។

២.៤ ការគ្រប់គ្រងលុយកាក់

អ្នកក៏អាចប្រើគោលការណ៍ខៃហ្សិននៅក្នុងការរៀបចំហិរញ្ញវត្ថុផ្ទាល់ខ្លួនផងដែរដើម្បីបង្កើតស្ថិរភាពផ្នែកហិរញ្ញវត្ថុ ដោយការផ្លាស់ប្តូរទម្លាប់តូចៗទៅលើការចំនាយ និងការសន្សំប្រាក់របស់អ្នក។ ឧទាហរណ៍ដូចជា៖

• សន្សំលុយ ១ ដុល្លារក្នុងមួយថ្ងៃ ហើយបង្កើនវាបន្តិចម្តងៗ
• ចាប់ផ្តើមតាមដានការចំនាយប្រចាំសប្តាហ៍ដើម្បីស្វែងរកកន្លែងដែលអ្នកអាចកាត់បន្ថយបាន
• ធ្វើស្វ័យប្រវត្តិកម្មក្នុងការបង់សេវាប្រចាំខែដើម្បីជៀសវាងការខាតបង់ដោយការពិន័យ។

ទម្លាប់សាមញ្ញៗបែបនេះអាចធ្វើអ្នកមានស្ថិរភាពកាន់តែខ្ពស់ក្នុងការគ្រប់គ្រងហិរញ្ញវត្ថុក្នុងរយៈពេលវែង។

២.៥ ទំនាក់ទំនង

ការកសាងនិងថែរក្សាទំនាក់ទំនងដែលរឹងមាំទាមទារនូវការខំប្រឹងប្រែង និងការប្រាស្រ័យទាក់ទង។ ឧទាហរណ៍៖

• ចំនាយពេល ៥ នាទីក្នុងមួយថ្ងៃ ដើម្បីស្តាប់មនុស្សជាទីស្រលាញ់របស់អ្នកប្រកបដោយការយកចិត្តទុកដាក់បំផុត
• ផ្ញើសារល្អៗទៅកាន់នរណាម្នាក់ឲ្យបានម្តងក្នុងមួយសប្តាហ៍
• ចំនាយពេល ១៥ នាទីក្នុងមួយសប្តាហ៍សំរាប់ការសន្ទនាដ៏មានអត្ថន័យជាមួយមិត្តភក្តិ ឬគ្រួសារ។

ការធ្វើទម្លាប់ល្អដូចឧទាហរណ៍ខាងលើជួយពង្រឹងនូវទំនាក់ទំនង និងបង្កើតចំណងទាក់ទងជ្រាលជ្រៅបាន។

២.៦ ការរៀនសូត្រ និងការអភិវឌ្ឍខ្លួនឯង

ការរៀនសូត្រពេញមួយជីវិតគឺជាស្នូលសំខាន់នៃ ការអភិវឌ្ឍខ្លួនឯង។ ខៃហ្សិនលើកទឹកចិត្តឲ្យយើងចេះអភិវឌ្ឍជំនាញថ្មី ឬបង្កើនចំនេះដឹងបន្តិចម្តងៗ។ ឧទាហរណ៍ខ្លះនៃការអនុវត្តមានដូចជា៖

• ចាប់ផ្តើមអានសៀវភៅមួយទំព័រក្នុងមួយថ្ងៃ ហើយបង្កើនវាឲ្យដល់អានមួយជំពូកក្នុងមួយថ្ងៃ
• រៀនពាក្យឬឃ្លាថ្មីៗមួយឬពីរឃ្លាក្នុងមួយថ្ងៃអំពីភាសាបរទេសថ្មីមួយឲ្យបានរៀងរាល់ថ្ងៃ

ការធ្វើបែបនេះជារៀងរាល់ថ្ងៃនឹងបង្កើតលទ្ធផលជាដុំកំភួនក្នុងរយៈពេលវែង។

៣. ការលំបាកក្នុងការអនុវត្តខៃហ្សិនប្រចាំថ្ងៃ

ការអនុវត្តខៃហ្សិនមើលទៅងាយ និងសាមញ្ញ តែតាមពិតអ្នកក៏នឹងជួបការលំបាកក្នុងការធ្វើវាដែរ។ ជាចំណុចចាប់ផ្តើម គឺភាពមិនអត់ធ្មត់។​ លទ្ធផលដែលបានពីការអនុវត្តខៃហ្សិន ហាក់ដូចជាយឺត ដែលនាំទៅរកការអន់ចិត្ត។ អ្នកអាចជំនះបញ្ហានេះដោយការផ្តោតលើអត្ថប្រយោជន៍ក្នុងរយៈពេលវែងវិញ។ ការអាក់ខានជាបញ្ហាទី ២។ វាអាចនឹងមានការលំបាកក្នុងការរក្សានូវភាពទៀតទាត់។ អ្នកអាចប្រើប្រាស់ការរំលឹក ឬមនុស្សដែលជួយដាស់តឿន ឬកម្មវិធីទូរស័ព្ទដែលជួយរំលឹកអ្នក។ ចំពោះខ្ញុំផ្ទាល់ ខ្ញុំប្រើប្រាស់កម្មវិធីទូរស័ព្ទដើម្បីជួយរំលឹកខ្ញុំ នោះគឺ Google Tasks។ អ្នកអាចរកកម្មវិធីនេះនៅក្នុង App Store ឬ Play Store។ ចុងក្រោយ ទម្លាប់ចាស់មួយចំនួនអាចនឹងពិបាកកែប្រែ តែអ្នកអាចចាប់ផ្តើមពីតិចៗទៅ ក្នុងការផ្លាស់ប្តូរប្រកបដោយភាពងាយស្រួល។

ជាការសន្និដ្ឋានចុងក្រោយ ខៃហ្សិន (Kaizen) គឺជាទស្សនវិជ្ជាមួយដែលមានតម្លៃជាអមតៈ ដែលបញ្ជាក់ពីភាពអស្ចារ្យនៃការខិតខំប្រឹងប្រែងតូចៗឈានទៅដល់ការបង្កើតលទ្ធផលធំៗ។ ជាការពិតណាស់ ការអនុវត្តគោលការណ៍របស់ ខៃហ្សិនក្នុងទម្លាប់ជីវិតប្រចាំថ្ងៃនឹងជួយឲ្យអ្នកអាចធ្វើឲ្យប្រសើរឡើងនូវ សុខភាព ទំនាក់ទំនង ផលិតភាពការងារ និងសុខុមាលភាពផ្លូវចិត្តជាទូទៅ។ ដំណើរនៃការអភិវឌ្ឍខ្លួនឯងមិនមែនជាការធ្វើអ្វីមួយឲ្យបានល្អឥតខ្ជោះនោះទេ តែវាជាដំណើរនៃការរីកចម្រើនបន្តិចម្តងៗមិនឈប់ឈរ។​ អ្នកប្រាកដជាអាចផ្លាស់ប្តូរជីវិតរបស់អ្នកបានតាមរយៈការអនុវត្តទស្សនវិជ្ជាខៃហ្សិននេះតាមរយៈជំហានតូចៗ ដែលធ្វើជាប់ជាប្រចាំ។ តើលោកអ្នកយល់យ៉ាងណាដែរចំពោះទស្សនវិជ្ជានេះ? តើលោកអ្នកចង់អនុវត្តវាក្នុងជីវិតរបស់លោកអ្នកដែរឬទេ? សូមជួយផ្តល់យោបល់ខាងក្រោម។