សៀវភៅ ចិត្តវិទ្យាអំពីលុយ (The Psychology of Money) និពន្ធដោយលោក ម៉ហ្កាន ហៅសល បង្ហាញអំពីរបៀបដែលឥរិយាបថនិងអារម្មណ៍របស់មនុស្សជាកត្តាកំណត់ពីភាពជោគជ័យផ្នែកហិរញ្ញវត្ថុធំជាងចំនេះដឹង ឬជំនាញបច្ចេកទេស។ តាមរយៈបទពិសោធន៍ និងរឿងរ៉ាវពិតៗ សៀវភៅនេះបង្ហាញពីសារសំខាន់នៃភាពអត់ធ្មត់ ការធ្វើសមាសកម្មការប្រាក់ ការស្គាល់ពីភាពគ្រប់គ្រាន់ និងការជៀសវាងការរស់នៅតាមបែបជីវិតលើសពីសមត្ថភាព។ អ្នកនិពន្ធគាំទ្រការគិតបែបរយៈពេលវែង ការចេះសន្សំប្រាក់សំរាប់ភាពបត់បែន និងការប្រើប្រាស់លុយជាឧបករណ៍ដើម្បីសម្រេចបាននូវសេរីភាព និងសុភមង្គល ដែលទាំងអស់នេះនឹងជួយឲ្យអ្នកស្គាល់នូវភាពឯករាជ្យផ្នែកហិរញ្ញវត្ថុ និងការរស់នៅប្រកបដោយអត្ថន័យ។ ខាងក្រោមនេះជាសារសំខាន់ៗចេញពីសៀវភៅនេះ។
សារសំខាន់ទីមួយគឺនិយាយអំពីតួនាទីនៃឥរិយាបថនៅក្នុងភាពជោគជ័យផ្នែកហិរញ្ញវត្ថុ។ ភាពជោគជ័យផ្នែកហិរញ្ញវត្ថុតាមពិតមិនមែនស្ថិតលើចំនេះដឹងបច្ចេកទេសជាចំបងនោះទេ។ បុគ្គលម្នាក់ដែលទោះមានចំនេះដឹងត្រឹមកំរិតមធ្យម តែគាត់មានទម្លាប់ល្អ អាចជោគជ័យជាងបុគ្គលដែលមានចំនេះដឹងខ្លាំងផ្នែកហិរញ្ញវត្ថុ តែមានវិន័យខ្លួនឯងអន់ជាង។
សារសំខាន់ទី ពីរនោះគឺនិយាយអំពី តួនាទីនៃសំណាង ហានិភ័យ និងភាពស្មុគ្រស្មាញនៃលទ្ធផល។ នៅក្នុងសារនេះ អ្នកនិពន្ធចង់និយាយថា ភាពជោគជ័យផ្នែកហិរញ្ញវត្ថុជាញឹកញាប់ពឹងផ្អែកលើទាំង សំណាង និងហានិភ័យ។ ចូរទទួលស្គាល់ថា គ្មាននរណាម្នាក់ដែលទទួលបានជោគជ័យដោយសារបុណ្យសក្តិ ឬជំនាញតែមួយមុខនោះទេ។ ពេលវេលា និងកត្តាដែលមិនអាចគ្រប់គ្រងបាននៅតែដើរតួនាទីមួយដែរ។ ស្រដៀងគ្នានេះដែរ សូមកុំបន្ទោសខ្លួនឯងសំរាប់រាល់ភាពបរាជ័យផ្នែកហិរញ្ញវត្ថុ។
សារសំខាន់ទី ៣ គឺនិយាយអំពីការធ្វើសមាសកម្មការប្រាក់ ដែលត្រូវបានចាត់ទុកជា វត្ថុអច្ឆរិយៈទី ៨។ ការធ្វើសមាសកម្មការប្រាក់គឺជាវិធីសាស្ត្រដ៏មានថាមពលអស្ចារ្យ ប៉ុន្តែវាទាមទារនូវភាពអត់ធ្មត់។ ពេលវេលាគឺជាកត្តាដ៏សំខាន់បំផុតសំរាប់ការកសាងទ្រព្យសម្បត្តិ។ កិច្ចខិតខំប្រឹងប្រែងមួយជំហានតូចៗ ហើយទៀងទាត់ក្នុងរយៈពេលវែងណាមួយនឹងផ្តល់នូវលទ្ធផលដ៏ធំធេង។
សារសំខាន់ទី ៤ គឺ ការសន្សំលុយមិនមែនសំរាប់តែគោលដៅធំៗនោះទេ តែវាក៏សំរាប់កាលៈទេសៈបត់បែនផងដែរ។ សូមកុំគិតថា ការសន្សំលុយគឺសំរាប់តែទិញរបស់ធំៗ ឬសំរាប់ការចូលនិវត្តន៍ ជាដើម តែវាក៏ផ្តល់នូវការត្រៀមខ្លួនសំរាប់កាលៈទេសៈបត់បែន ផ្តល់ភាពឯករាជ្យ និងសមត្ថភាពក្នុងការដោះស្រាយជាមួយបញ្ហាមិនអាចដឹងជាមុន ប្រកបដោយភាពងាយស្រួល ជៀសវាងការស្ត្រេសដោយសារវា។
សារសំខាន់ទី ៥ គឺ ការកំណត់ភាពគ្រប់គ្រាន់។ ការដេញតាមលុយ ឋានៈ ឬទ្រព្យសម្បត្តិ មិនចេះឆ្អែតឆ្អន់ អាចបណ្តាលឲ្យអ្នកធ្លាក់ចូលក្នុងហានិភ័យ និងការខកចិត្តបរាជ័យ។ អ្នកគួរតែចេះកំណត់នូវភាពគ្រប់គ្រាន់របស់ខ្លួន តើភាពគ្រប់គ្រាន់មានអត្ថន័យដូចម្តេចចំពោះអ្នក ហើយអ្នកត្រូវតែដឹងថា ពេលណាដែលអ្នកត្រូវបញ្ឈប់ការធ្វើសកម្មភាពក្នុងដេញតាមរបស់ទាំងនោះ ដោយភាពលោភលន់ ដូចពាក្យចាស់តែងតែនិយាយថា ភាពលោភលន់នឹងនាំឲ្យវិនាស។
សារសំខាន់ទី ៦គឺ និយាយអំពីទំនាក់ទំនងនៃអារម្មណ៍ និងលុយ។ ការសម្រេចចិត្តពាក់ព័ន្ធនឹងលុយគឺត្រូវបានដឹកនាំដោយអារម្មណ៍ បទពិសោធន៍ និងការយល់ឃើញរៀងៗខ្លួន។ ឥរិយាបថរបស់អ្នកចំពោះលុយនឹងបង្ហាញនូវការធំដឹងក្តី ប្រវត្តផ្ទាល់ខ្លួន និងកាលៈទេសៈជីវិតរបស់អ្នក។
សារសំខាន់ទី ៧ គឺ ការជៀសវាងនូវការរស់នៅបែបជីវិតលើសពីសមត្ថភាព។ នៅពេលដែលប្រាក់ចំណូលរបស់អ្នកមានការកើនឡើង អ្នកតែងតែចង់ដំឡើងនូវរបៀបរបបរស់នៅឲ្យឡូយឆាយជាងមុន។ តែមុននឹងធ្វើវា អ្នកគួររៀនប្រឆាំងនឹងការគិតបែបនេះ អ្នកត្រូវរៀនរក្សាចន្លោះរវាងចំណូល និងចំនាយ ដែលវាជាកូនសោរទៅកាន់ភាពមានបានក្នុងរយៈពេលវែង។
សារសំខាន់ទី ៨ គឺ ពេលវេលាគឺជាទ្រព្យសម្បត្តិចុងក្រោយ។ តម្លៃពិតនៃលុយគឺឋិតលើសេរីភាពដែលវាអាចផ្តល់ឲ្យ។ ភាពឯករាជ្យផ្នែកហិរញ្ញវត្ថុផ្តល់ឲ្យអ្នកនូវអំនាចក្នុងការគ្រប់គ្រងពេលវេលារបស់អ្នក ដែលវាជាធនធានដ៏មានតម្លៃ និងកម្របំផុត។
សារសំខាន់ទី ៩ គឺ មនុស្សមានការយល់ឃើញផ្សេងគ្នាអំពីលុយ។ ការយល់ឃើញអំពីលុយរបស់មនុស្សគឺត្រូវបានកំណត់ដោយបទពិសោធន៍ជីវិតផ្សេងៗ ដោយឡែកៗរបស់គេ។ ចូរជៀសវាងការវាយតម្លៃអ្នកដទៃ ឬការធ្វើតាមអ្នកដទៃដោយងងឹតងងល់ ពីព្រោះស្ថានភាព និងគោលដៅរបស់ពួកគេអាចខុសពីអ្នក។
សារសំខាន់ទី ១០ គឺការគ្រប់គ្រងហានិភ័យ និងការកំណត់ព្រំដែនសុវត្ថិភាព។ ចូរបង្កើតនូវរនាំងការពារផ្នែកហិរញ្ញវត្ថុដោយការសន្សំ និងការជៀសវាងការប្រើប្រាស់ការប្រថុយទុនលើសលប់ខ្លាំងពេក។ ព្រំដែនការពារផ្នែកហិរញ្ញវត្ថុនឹងជួយអ្នកទប់ទល់នឹងហានិភ័យ និងភាពមិនច្បាស់លាស់ផ្សេងៗដែលអាចកើតឡើងដោយមិនអាចជៀសរួច។
សារសំខាន់ទី ១១ គឺភាពអត់ធ្មត់ និងការគិតបែបរយៈពេលវែង។ លទ្ធផលដែលធំធេងបំផុតនឹងធ្លាក់លើអ្នកដែលមិនចង់បានលទ្ធផលភ្លាមៗ និងចេះគិតបែបរយៈពេលវែង។ ការចំនេញរហ័សៗតែងតែជារឿងដែលកម្រ ហើយភាពមិនចេះអត់ធ្មត់ជាញឹកញាប់នឹងនាំទៅកាន់ការសម្រេចចិត្តផ្នែកហិរញ្ញវត្ថុដែលខុស ឬអន់ថយ។
សារសំខាន់ទី ១២ គឺ ការបញ្ឈប់ការប្រៀបខ្លួននឹងអ្នកដទៃ។ ការប្រៀបធៀបខ្លួនឯងពាក់ព័ន្ធនឹងការមានលុយច្រើនជាង ឬតិចជាង គឺមិនល្អសំរាប់អ្នកនោះទេ ហើយបង្កឲ្យមានអារម្មណ៍ស្ត្រេស។ អ្វីដែលដឹកនាំការសម្រេចចិត្តផ្នែកហិរញ្ញវត្ថុរបស់អ្នកគួរតែជាគោលដៅ និងតម្លៃផ្ទាល់ខ្លួនរបស់អ្នក មិនមែនជាភាពជោគជ័យ ឬភាពមានបានរបស់អ្នកដទៃនោះទេ។
សារសំខាន់ចុងក្រោយនោះគឺ ការជៀសវាងការមានអំនួត ឬទំនុកចិត្តជ្រុល ហើយគោរពនូវវត្តមាននៃភាពមិនច្បាស់លាស់។ គ្មាននរណាម្នាក់អាចដឹងនូវអនាគតមុននោះទេ។ សូមចេះបន្ទាបខ្លួន ជៀសវាងអំនួត ឬភាពមានទំនុកចិត្តជ្រុល ហើយធ្វើផែនការប្រកបដោយភាពបត់បែនដើម្បីត្រៀមសំរាប់បញ្ហានៅពេលអនាគតដែលមិនអាចដឹងមុន។
សារជាស្នូលនៃសៀវភៅនេះ
គោលគំនិតសំខាន់នៃសៀវភៅ ចិត្តវិទ្យាអំពីលុយ (The Psychology of Money) គឺភាពជោគជ័យផ្នែកហិរញ្ញវត្ថុមិនមែនឋិតលើ ថាតើអ្នកចេះដឹងអំពីវាប៉ុណ្ណានោះទេ ប៉ុន្តែវាឋិតលើឥរិយាបថរបស់អ្នក។ ការចេះគិតពិចារណាបានល្អ វិន័យផ្ទាល់ខ្លួន និងការផ្តោតលើគោលដៅរយៈពេលវែង មានភាពសំខាន់ច្រើនជាងឆ្ងាយជាងការព្យាយាមយកឈ្នះទីផ្សារ ឬការដេញការចំនេញបែបរហ័សៗ។ ចុងក្រោយ លុយគឺជាឧបករណ៍ដើម្បីសម្រេចបាននូវសេរីភាព សន្តិសុខ និងសុភមង្គល ហើយអ្នកខ្លួនឯងជាអ្នកសម្រេចចិត្តថា តើអ្នកចង់ជោគជ័យបែបណាជាមួយជីវិតហិរញ្ញវត្ថុរបស់អ្នក។
ខ្ញុំបាទឈ្មោះ ខាន់ ប៉ុណ្ណារ៉ា។ ខ្ញុំបានរៀនចប់បរិញ្ញាបត្រផ្នែកអប់រំពីសាកលវិទ្យាល័យភូមិន្ទភ្នំពេញ និង អនុបណ្ឌិតផ្នែកវិទ្យាសាស្ត្រសង្គមពីសាកលវិទ្យាល័យឈៀងម៉ៃ។ ខ្ញុំចូលចិត្តការអាន និងការសរសេរ ហើយប្រកាន់ភ្ជាប់ការអភិវឌ្ឍខ្លួនឯងជានិច្ច។ សូមជួយ Follow ដើម្បីទទួលបានមាតិកាថ្មីៗ។ សូមអរគុណ!
