ការប្រើប្រាស់បណ្តាញសង្គម ដើម្បីកសាងអាជីពការងារឲ្យបានល្អប្រសើរ

ពួកយើងកំពុងរស់នៅក្នុងពិភពលោកឌីជីថលនាសម័យបច្ចុប្បន្ន ដែលជួនកាលវត្តមានរបស់យើងនៅលើអនឡាញអាចនឹងបង្ហាញពីយើងបានច្រើនជាងរូបពិតយើងទៅទៀត។ បណ្តាញសង្គមបានប្រែក្លាយពីការបង្កើតបណ្តាញទំនាក់ទំនងបែបប្រពៃណីទៅជាផលប្រយោជន៍ផ្នែកអាជីពដ៏សំខាន់។ បណ្តាញសង្គមដូចជា LinkedIn Twitter និង Instagram ជាដើមបានក្លាយជាមធ្យោបាយមួយក្នុងការអភិវឌ្ឍអាជីពការងារ ការបង្កើតប្រែនខ្លួនឯង និងឥទ្ធិពលនៅក្នុងវិស័យការងារផងដែរ។ ប៉ុន្តែ វាក៏ក្លាយជាទំនួលខុសត្រូវផងដែរក្នុងការបង្ហាញខ្លួនអ្នកនៅលើបណ្តាញសង្គមដែលជះឥទ្ធិពលមកលើអត្តសញ្ញាណអាជីពការងាររបស់យើង។

១. ការប្រើប្រាស់ LinkedIn ក្នុងការអភិវឌ្ឍអាជីពការងារ

LinkedIn គឺជាបណ្តាញសង្គមបែបអាជីពមួយ ដែលគេតែងតែហៅថា ជា ហ្វេសប៊ុកសំរាប់ក្រុមហ៊ុនសាជីវកម្ម។ ការស្រាវជ្រាវបានបង្ហាញថា ៨៧% នៃអ្នករើសបុគ្គលិកកំពុងប្រើប្រាស់ LinkedIn យ៉ាងសកម្មដើម្បីស្វែងរកបុគ្គលិកដែលមានសក្តានុពល។ គណនេយ្យ LinkedIn របស់អ្នកមិនត្រឹមតែជា ប្រវត្តិរូបការងារសង្ខេប (CV) ប៉ុណ្ណោះទេ តែវាក៏ជាវេទិកាបង្ហាញពីជំនាញបច្ចេកទេសរបស់អ្នក ស្នាដៃ និងដំណើរនៃអាជីពការងាររបស់អ្នកផងដែរ។ ជាឧទាហរណ៍ លោក ចេន ដែលជាអ្នកជំនាញទីផ្សារ គាត់បានចាប់ផ្តើមចែករំលែកទស្សនៈរបស់គាត់ទាក់ទងនឹងទីផ្សារឌីជីថល។ ដោយសារតែវត្តមានរបស់គាត់លើបណ្តាញ LinkedIn បានធ្វើឲ្យគាត់មានភាពល្បីល្បាញក្នុងវិស័យការងាររបស់គាត់ និងទទួលបានការផ្តល់ការងារច្រើនកន្លែងដែលចង់បានគាត់ ដែលបញ្ជាក់ថា LinkedIn មិនត្រឹមតែជាបណ្តាញសំរាប់រកការងារប៉ុណ្ណោះទេ តែក៏ជាវេទិកាសំរាប់កសាងអាជីពការងារផងដែរ.

២. ការប្រើប្រាស់បណ្តាញសង្គមផ្សេងទៀតសំរាប់អាជីពការងារ

Facebook៖ បើទោះជាហ្វេសប៊ុកភាគច្រើនប្រើប្រាស់សំរាប់តែការទំនាក់ទំនងសង្គមជាទូទៅ តែយើងក៏អាចប្រើប្រាស់ជាលក្ខណៈ ក្រុម​ សំរាប់ទំនាក់ទំនងជាមួយបុគ្គលផ្សេងៗទៀតដែលមានអាជីពការងារដូចគ្នា ឬស្រដៀងគ្នាផងដែរ។

Instagram៖ សាកសមសំរាប់អ្នកផលិតការរចនា រូបភាព រូបថត និងបុគ្គលមានឥទ្ធិពលដែលប្រើប្រាស់វាដើម្បីតាំងស្នាដៃបង្ហាញដល់អ្នកដទៃ។

Tik Tok៖ កំពុងមានការពេញនិយមក្លាយជាបណ្តាញសំរាប់អ្នកជំនាញចែករំលែក ដំបូន្មានអំពីអាជីព និងទស្សនវិស័យផ្សេងៗទាក់ទងនឹងវិស័យរបស់ខ្លួន ដែលអាចទទួលបានអ្នកទស្សនាច្រើន។

៣. ផលប៉ះពាល់ផ្នែកផ្លូវចិត្តនៃបណ្តាញសង្គមមកលើអត្តសញ្ញាណជាអ្នកជំនាញអាជីព

សំពាធក្នុងការរក្សានូវរូបភាពជាអ្នកជំនាញអាជីពអាចធ្វើឲ្យយើងមានការនឿយហត់បាន។ ការសិក្សា ដោយ សាកលវិទ្យាល័យហាវ៉ឺត បានឲ្យដឹងថា អ្នកប្រើប្រាស់បណ្តាញសង្គមភាគច្រើនមានបទពិសោធន៍នៃបញ្ហាផ្លូវចិត្តម្យ៉ាងអំពីរូបភាពរបស់គេដែលផូសលើនៅក្នុងបណ្តាញសង្គម។ ការប្រៀបធៀបខ្លួនឯងទៅនឹងអ្នកដទៃ និងការចង់បានការទទួលស្គាល់អាចបង្កទៅជាអាការៈខ្វះទំនុកចិត្តលើខ្លួនឯង។ ទោះជាយ៉ាងណាក៏ដោយ ការបង្ហាញពីភាពពិតដោយមានការរក្សានូវកិត្តិយសអាចជួយសំរាលបន្ទុកនេះ និងបង្កើតនូវវត្តមានអនឡាញដែលពិតប្រាកដមួយបាន។

៤. យុទ្ធសាស្ត្រក្នុងការកសាងនូវអត្តសញ្ញាណល្អក្នុងបណ្តាញសង្គម

ទាំងនេះគឺជាយុទ្ធសាស្ត្រខ្លះៗដើម្បីជួយដល់ការបង្កើតនូវអត្តសញ្ញាណល្អប្រសើរក្នុងបណ្តាញសង្គម។ ដំបូងអ្នកត្រូវបង្កើត ទំព័រមុខរបស់បណ្តាញសង្គមរបស់អ្នកដែលមានភាពទាក់ទាញ ដូចជា ការប្រើប្រាស់រូបថតផ្លូវការណ៍ ការសរសេររៀបរាប់ខ្លួនឯងដែលនិយាយទាក់ទងនឹងអាជីពការងារ និងបង្ហាញនូវជំនាញរបស់អ្នកដោយសង្ខេប។ លើសពីនេះ អ្នកត្រូវធ្វើឲ្យទំព័រមុខនៃបណ្តាញសង្គមរបស់អ្នកស្រដៀងៗគ្នាសំរាប់គ្រប់បណ្តាញសង្គមទាំងអស់។ បន្ទាប់មក អ្នកត្រូវបន្តផូសអំពីមាតិកាដែលពាក់ព័ន្ធនឹងអាជីពការងាររបស់អ្នក និងចូលរួមក្នុងការពិភាក្សាផ្សេងៗផងដែរ។ ចុងក្រោយ អ្នកត្រូវបង្កើតនូវបណ្តាញទំនាក់ទំនងជាមួយអ្នកធ្វើការងារដូចគ្នា អ្នកល្បីឈ្មោះក្នុងវិស័យជាមួយគ្នា និងក្រុមហ៊ុនរើសបុគ្គលិក។

អ្នកគួរជៀសវៀងនូវកំហុសមួយចំនួនសំរាប់ការប្រើប្រាស់បណ្តាញសង្គមសំរាប់ការងារ។ ជាបឋម អ្នកត្រូវជៀសវាងការចែករំលែកនូវមតិយោបល់ផ្ទាល់ខ្លួនច្រើនពេក។ អ្នកត្រូវមានការប្រុងប្រយ័ត្នចំពោះប្រធានបទដែលមានភាពចម្រុងចម្រាស់ ក្នុងការចែករំលែកលើទំព័របណ្តាញសង្គមដែលអ្នកប្រើប្រាស់សំរាប់អាជីពការងារ។ អ្នកត្រូវបន្តសកម្មភាពផូសឲ្យបានទៀងទាត់ ទំព័របណ្តាញសង្គមដែលមិនមានសកម្មភាពសោះ អាចកាត់បន្ថយភាពទុកចិត្តពីទស្សនិកជន។

ជាការសន្និដ្ឋាន បណ្តាញសង្គមលែងជាជំរើសបន្ទាប់បន្សំសំរាប់អ្នកជំនាញអាជីពទៀតហើយ តែវាមានភាពចាំបាច់ក្នុងសម័យបច្ចុប្បន្ន។ មិនថាអ្នកជាអ្នកស្វែងរកការងារ ជាសហគ្រិន ឬអ្នកដឹកនាំជំនួញធំៗ ការបង្ហាញខ្លួនលើបណ្តាញសង្គមអាចដឹកនាំនូវដំណើរវិវត្តនៃអាជីពរបស់អ្នកបាន។ ការប្រើប្រាស់បណ្តាញសង្គមដូចជា LindedIn និង Twitter តាមបែបយុទ្ធសាស្ត្រអាចបង្កើតអត្តសញ្ញាណអាជីពការងារដ៏មានសារប្រយោជន៍។